રાજકોટઃ ઉનાળાની કાળઝાળ ગરમી વચ્ચે રાજકોટમાં એક અત્યંત આઘાતજનક ઘટના સામે આવી છે. જેમાં આજી ડેમમાં ન્હાવા પડેલા એક જ પરિવારના 4 સભ્યોના મોત નીપજ્યા છે. 

આ ઘટનાની જાણ થતાં જ પોલીસ કાફલા સહિત સ્થાનિક તરવૈયાઓની ટીમ ઘટનાસ્થળે પહોંચી હતી અને રેસ્ક્યૂ ઓપરેશન હાથ ધર્યું હતું. ફાયરવિભાગની ટીમ પણ આ ઘટનાની જાણ થતાં તાત્કાલિક પહોંચી ગઈ હતી. ભારે જહેમત બાદ ફાયરવિભાગની ટીમે 3 સભ્યોના મૃતદેહ બહાર કાઢ્યા હતા અને એક મૃતદેહની શોધખોળ હજુ ચાલુ છે.

મળતી માહિતી પ્રમાણે, કાળઝાળ ગરમી વચ્ચે એક જ પરિવારના સભ્યો આજી ડેમ ખાતે ન્હાવા માટે આવ્યા હતા. ત્યારે ન્હાતી વેળા ચારેય સભ્યો આજી ડેમમાં ડૂબી ગયા હતા અને ચારેયના મોત નીપજ્યા હતા. ત્યારે પોલીસે આ મામલે પ્રાથમિક તપાસ હાથ ધરી હતી. પોલીસે ચારેય મૃતકોની ઓળખ મેળવવા માટે કવાયત હાથ ધરી હતી અને આ મામલે કાયદેસરની કાર્યવાહી શરૂ કરી છે.