માંગરોળ: માંગરોળ ખાતે સ્થાનિક સ્વરાજની ચૂંટણી પહેલાં રાજકીય માહોલ ગરમાયો છે. આમ આદમી પાર્ટીના ઉમેદવાર નીલેશ માલમના ગોડાઉનમાંથી પોલીસે દારૂનો જથ્થો જપ્ત કરતા મામલો ચર્ચામાં આવ્યો છે.

પોલીસને મળેલી બાતમીના આધારે શીલ પોલીસ સ્ટેશન દ્વારા રેડ પાડવામાં આવી હતી. દરોડા દરમિયાન ગોડાઉનમાંથી કુલ 96 નંગ દારૂની બોટલો જપ્ત કરવામાં આવી હતી. ઉપરાંત, સ્થળ પરથી રૂ. 1 લાખથી વધુ રોકડ રકમ તેમજ એક મોબાઈલ ફોન પણ કબજે લેવામાં આવ્યા છે.

આ સમગ્ર મામલે પોલીસે નીલેશ માલમની ધરપકડ કરી આગળની કાનૂની કાર્યવાહી હાથ ધરી છે. પ્રાથમિક તપાસમાં દારૂની હેરાફેરી સાથે સંકળાયેલા હોવાના સંકેતો મળ્યા હોવાનું પોલીસ સૂત્રોએ જણાવ્યું છે.

ચૂંટણીના ટાણે બનેલી આ ઘટનાને કારણે વિસ્તારમાં રાજકીય ગરમાવો વધી ગયો છે. ખાસ કરીને ઉમેદવારના ગોડાઉનમાંથી દારૂ મળતા વિરોધ પક્ષો દ્વારા આ મુદ્દે ટીકા કરવામાં આવી રહી છે. આ ઘટનાથી પક્ષની છબી પર પણ અસર પડે તેવી શક્યતા વ્યક્ત કરવામાં આવી રહી છે.

પોલીસ હાલમાં સમગ્ર મામલે વધુ તપાસ કરી રહી છે અને અન્ય કોઈ સંડોવણી છે કે નહીં તે દિશામાં પણ તપાસ ચાલી રહી છે.