વ્હાઇટ હાઉસ પાસે ગોળીબારની ઘટના

અમેરિકાના White House નજીક શનિવારે સાંજે ગોળીબારની ચોંકાવનારી ઘટના સામે આવી હતી. સીક્રેટ સર્વિસના અધિકારીઓએ જવાબી કાર્યવાહી કરતા હુમલાખોરને ઠાર માર્યો હતો. ઘટનામાં એક સામાન્ય નાગરિક પણ ઘાયલ થયો હોવાનું સામે આવ્યું છે.

ટ્રમ્પ વ્હાઇટ હાઉસમાં હાજર હતા

ઘટના સમયે અમેરિકાના રાષ્ટ્રપતિ Donald Trump વ્હાઇટ હાઉસની અંદર હાજર હતા. અધિકારીઓએ જણાવ્યું કે તેમની સુરક્ષાને કોઈ ખતરો પહોંચ્યો નહોતો અને સરકારી કામગીરી પર પણ કોઈ અસર પડી નથી.

17મી સ્ટ્રીટ પાસે શરૂ થયો હુમલો

આ ઘટના શનિવારે સાંજે લગભગ 6 વાગ્યે 17મી સ્ટ્રીટ અને પેન્સિલવેનિયા એવન્યુ NW નજીક બની હતી. સીક્રેટ સર્વિસના ચીફ ઓફ કમ્યુનિકેશન એન્થોની ગુગ્લિયેલ્મીએ જણાવ્યું કે એક વ્યક્તિએ પોતાના બેગમાંથી હથિયાર બહાર કાઢીને અંધાધૂંધ ફાયરિંગ શરૂ કર્યું હતું.

સીક્રેટ સર્વિસે આપી તરત જ જવાબી કાર્યવાહી

સીક્રેટ સર્વિસના અધિકારીઓએ તરત જ હુમલાખોર સામે જવાબી ફાયરિંગ કર્યું હતું. ગોળી વાગતા હુમલાખોરને હોસ્પિટલ ખસેડવામાં આવ્યો હતો, જ્યાં ડોક્ટરોએ તેને મૃત જાહેર કર્યો હતો.

એક રાહદારી પણ ગંભીર રીતે ઘાયલ

ગોળીબાર દરમિયાન એક સામાન્ય નાગરિકને પણ ગોળી વાગી હતી. જોકે સુરક્ષા અધિકારીઓને કોઈ ઇજા પહોંચી નહોતી. હાલ ઘાયલ વ્યક્તિની સ્થિતિ અંગે સત્તાવાર માહિતી જાહેર કરવામાં આવી નથી.

હુમલાખોરની ઓળખ હજુ જાહેર નથી

અધિકારીઓએ હજુ સુધી હુમલાખોરની ઓળખ જાહેર કરી નથી. હુમલા પાછળનું કારણ શું હતું તે અંગે પણ તપાસ ચાલી રહી છે.

વ્હાઇટ હાઉસ પરિસરમાં લોકડાઉન જેવી સ્થિતિ

ઘટના બાદ થોડા સમય માટે સમગ્ર વ્હાઇટ હાઉસ પરિસરમાં લોકડાઉન જેવી સ્થિતિ સર્જાઈ હતી. હથિયારોથી સજ્જ સીક્રેટ સર્વિસના એજન્ટોને નોર્થ લોન વિસ્તારમાં તૈનાત કરવામાં આવ્યા હતા.

પત્રકારો અને સ્ટાફને સુરક્ષિત સ્થળે ખસેડાયા

સુરક્ષા ટીમોએ ત્યાં હાજર પત્રકારો અને સ્ટાફને તાત્કાલિક પ્રેસ બ્રીફિંગ રૂમમાં ખસેડી દીધા હતા. CNNના અહેવાલ મુજબ એજન્ટો સતત “નીચે ઝૂકો” અને “ગોળીબાર ચાલી રહ્યો છે” જેવી ચેતવણીઓ આપી રહ્યા હતા.

અનેક ગોળીઓના અવાજોથી મચી અફરાતફરી

વ્હાઇટ હાઉસ નજીક હાજર પત્રકારોએ સતત અનેક ગોળીઓના અવાજો સાંભળ્યાનો દાવો કર્યો હતો. ન્યૂયોર્ક ટાઈમ્સની ફોટોગ્રાફર એલિસન રોબર્ટે જણાવ્યું કે તેમણે આશરે 20થી 30 ગોળીઓના અવાજો સાંભળ્યા હતા.

FBI સહિત અનેક એજન્સીઓ તપાસમાં જોડાઈ

Federal Bureau of Investigationના ડિરેક્ટર Kash Patelએ જણાવ્યું કે FBI પણ ઘટનાસ્થળે પહોંચી ગઈ છે અને સીક્રેટ સર્વિસને તપાસમાં મદદ કરી રહી છે.

આસપાસના રસ્તાઓ કલાકો સુધી બંધ

ઘટના બાદ મેટ્રોપોલિટન પોલીસ, નેશનલ ગાર્ડ સહિતની અનેક એજન્સીઓ સ્થળ પર પહોંચી હતી. સુરક્ષા કારણોસર વ્હાઇટ હાઉસ આસપાસના રસ્તાઓને અનેક કલાકો સુધી બંધ રાખવામાં આવ્યા હતા.

અગાઉ પણ બની હતી ગોળીબારની ઘટના

આ ઘટના તે ગોળીબાર બાદ સામે આવી છે, જેણે એક મહિના પહેલાં વોશિંગ્ટનમાં યોજાયેલા વ્હાઇટ હાઉસ કોરસ્પોન્ડન્ટ્સ એસોસિએશન ડિનરને પણ અસર કરી હતી. તે કાર્યક્રમમાં અનેક મોટા અધિકારીઓ, પત્રકારો અને રાજકીય આગેવાનો હાજર હતા.