અમદાવાદ: શહેરમાં શુક્રવારે મોડી રાત્રે ડ્રગ્સ રેડ દરમિયાન ચોંકાવનારી ઘટના સામે આવી છે, જેમાં ક્રાઈમ બ્રાન્ચની ટીમ પર હુમલો કરવામાં આવ્યો હતો. આ બનાવ ભાટ ગામ નજીક બન્યો હોવાનું જાણવા મળ્યું છે.

પોલીસને મળેલી બાતમીના આધારે એક યુવાન કારમાં MD ડ્રગ્સ લઈ જઈ રહ્યો હોવાની માહિતી મળી હતી. પોલીસે વાહનને રોકવાનો પ્રયાસ કરતા આરોપી ભાગવાનો પ્રયાસ કર્યો, જેના કારણે પીછો શરૂ થયો હતો. આ દરમિયાન આરોપીની કાર ક્રાઈમ બ્રાન્ચની ગાડી સાથે અથડાઈ હતી.

અથડામણ બાદ આરોપી કારમાંથી નીચે ઉતરી પોલીસ સબ-ઇન્સ્પેક્ટર (PSI) પર ચાકૂથી હુમલો કર્યો હતો, જેમાં PSI ઇજાગ્રસ્ત થયા હતા. જોકે, અન્ય પોલીસકર્મીઓએ તરત જ આરોપીને કાબૂમાં લઈ ધરપકડ કરી લીધી હતી.

કારની તપાસ દરમિયાન પોલીસને આશરે 300 ગ્રામ MD ડ્રગ્સ મળ્યા હતા, જેની કિંમત રૂ. 25 લાખથી વધુ હોવાનું કહેવાય છે.

ઇજાગ્રસ્ત PSIને તાત્કાલિક હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે. પોલીસે ગુનો નોંધી આગળની તપાસ હાથ ધરી છે.