જામનગર જિલ્લાના જોડિયા તાલુકાના ટીંબડી ગામે હૃદયદ્રાવક અકસ્માતની ઘટના સામે આવી છે. વાડી વિસ્તારમાં કામ દરમિયાન વીજ કરંટ લાગતાં 22 વર્ષીય માતા અને તેમના દોઢ વર્ષના માસૂમ પુત્રનું ઘટનાસ્થળે જ કરુણ મોત નીપજ્યું છે. આ દુર્ઘટનાએ સમગ્ર ટીંબડી ગામ સહિત આસપાસના પંથકમાં શોકનો માહોલ સર્જ્યો છે.

પ્રાથમિક માહિતી અનુસાર, ટીંબડી ગામના વાડી વિસ્તારમાં 22 વર્ષીય ગીતાબેન નાયક કામ કરી રહ્યા હતા. તે દરમિયાન અચાનક વીજ કરંટની ઝપેટમાં આવી ગયા હતા. માતાને બચાવવાના પ્રયાસ દરમિયાન તેમની સાથે રહેલો દોઢ વર્ષનો પુત્ર રાજેશ પણ કરંટની ઝપેટમાં આવી ગયો હતો. કરંટ એટલો ગંભીર હતો કે માતા અને પુત્ર બંનેનું ઘટનાસ્થળે જ મોત નીપજ્યું હોવાનું જાણવા મળ્યું છે.

ઘટનાની જાણ થતાં સ્થાનિક લોકો તરત જ મદદે દોડી આવ્યા હતા અને બંનેને સારવાર માટે ધ્રોલ સરકારી હોસ્પિટલ ખાતે ખસેડવામાં આવ્યા હતા. જોકે હોસ્પિટલમાં ફરજ પરના તબીબોએ તપાસ બાદ માતા અને પુત્ર બંનેને મૃત જાહેર કર્યા હતા.

ઘટનાની માહિતી મળતાં જોડિયા પોલીસ તાત્કાલિક ધ્રોલ સરકારી હોસ્પિટલ પહોંચી હતી અને સમગ્ર ઘટનાની તપાસ હાથ ધરી છે. પોલીસે અકસ્માત કેવી રીતે સર્જાયો અને વીજ કરંટ લાગવાનું ચોક્કસ કારણ શું હતું તે અંગે તપાસ શરૂ કરી છે. સાથે જ જરૂરી કાયદેસરની કાર્યવાહી પણ કરવામાં આવી રહી છે.

એક જ પરિવારના બે સભ્યોના અચાનક મોતથી પરિવારજનો પર દુઃખનો પહાડ તૂટી પડ્યો છે. ટીંબડી ગામમાં શોકનું વાતાવરણ છવાઈ ગયું છે અને ગ્રામજનોએ મૃતકોને ભાવભીની શ્રદ્ધાંજલિ અર્પણ કરી છે. સ્થાનિક લોકો દ્વારા વીજ સુરક્ષાને લઈને જરૂરી પગલાં ભરવાની માંગ પણ ઉઠી રહી છે, જેથી આવી દુર્ઘટનાઓની પુનરાવર્તન અટકાવી શકાય.