નવી દિલ્હી: ભારત-યુકે ફ્રી ટ્રેડ એગ્રીમેન્ટ (FTA)ના સંભવિત લાભોને ગ્રાહકો સુધી પહોંચાડતા જગુઆર લેન્ડ રોવર ઇન્ડિયાએ તેની ફ્લેગશિપ એસયુવી રેન્જ રોવર એસવીની કિંમતમાં મોટો ઘટાડો કર્યો છે.

માહિતી મુજબ, કંપનીએ રેન્જ રોવર એસવીની કિંમતમાં અંદાજે ₹75 લાખ સુધીનો ઘટાડો કર્યો છે. હવે તેની એક્સ-શોરૂમ કિંમત ₹4.25 કરોડથી ઘટીને ₹3.5 કરોડ થઈ ગઈ છે. તેમજ રેન્જ રોવર સ્પોર્ટ એસવીની કિંમત પણ ₹2.75 કરોડથી ઘટાડીને ₹2.35 કરોડ કરવામાં આવી છે.

કંપનીએ જણાવ્યું કે આ ઘટાડો યુકેમાંથી આયાત થતી સંપૂર્ણ તૈયાર યુનિટ (CBU) ગાડીઓ પર લાગુ પડશે. નવા ટેરિફ અને ભારત-યુકે વેપાર કરારના અનુમાનિત લાભોને ધ્યાનમાં રાખીને આ નિર્ણય લેવાયો છે.

કંપનીના મેનેજિંગ ડિરેક્ટર રાજન અંબાએ જણાવ્યું કે આ પગલું ગ્રાહકોને પ્રીમિયમ એસવી રેન્જ વધુ સુલભ બનાવવા માટે લેવામાં આવ્યું છે અને કંપનીના ગ્રાહક કેન્દ્રિત અભિગમને દર્શાવે છે.

તેમણે વધુમાં કહ્યું કે આ ઘટાડો તરત જ અમલમાં આવી ગયો છે અને ફ્રી ટ્રેડ એગ્રીમેન્ટના અમલ પર કંપનીનો વિશ્વાસ દર્શાવે છે.

બીજી તરફ, ભારતમાં સ્થાનિક રીતે બનેલા રેન્જ રોવર, રેન્જ રોવર સ્પોર્ટ, ઇવોક, વેલાર અને ડિસ્કવરી સ્પોર્ટ જેવા મોડલ્સની કિંમતોમાં કોઈ ફેરફાર કરવામાં આવ્યો નથી.

કંપનીએ આશા વ્યક્ત કરી છે કે આ પગલાથી ભારતમાં લક્ઝરી કાર માર્કેટમાં વેચાણ વધશે અને બ્રાન્ડની વૃદ્ધિ વધુ મજબૂત બનશે.