કેન્દ્રીય આરોગ્યમંત્રી જે.પી. નડ્ડાનો પૂર્વોત્તર પ્રવાસ, પૂરગ્રસ્ત વિસ્તારોમાં આરોગ્ય સેવાઓની કરશે સમીક્ષા

કેન્દ્રીય આરોગ્ય અને પરિવાર કલ્યાણ મંત્રી જે.પી. નડ્ડા 4થી 6 ઓગસ્ટ દરમિયાન પૂર્વોત્તર ભારતના ત્રણ દિવસના પ્રવાસે રહેશે. આ દરમિયાન તેઓ આસામ, નાગાલેન્ડ અને અરુણાચલ પ્રદેશના પૂર તથા ભૂસ્ખલનથી પ્રભાવિત વિસ્તારોની મુલાકાત લઈ આરોગ્ય સેવાઓની સ્થિતિની સમીક્ષા કરશે.

પ્રવાસના પ્રથમ દિવસે નડ્ડા નવી દિલ્હીથી આસામના ડિબ્રુગઢ પહોંચશે અને રાત્રિ રોકાણ કરશે. 5 ઓગસ્ટે તેઓ આસામના ચરાઈદેવ જિલ્લાની મુલાકાત લેશે. અહીં પૂરથી પ્રભાવિત વિસ્તારોમાં આરોગ્ય સુવિધાઓ, રાહત કામગીરી અને લોકોને આપવામાં આવતી તબીબી સેવાઓનું નિરીક્ષણ કરશે.

ત્યારબાદ તેઓ નાગાલેન્ડના મોન જિલ્લામાં પહોંચશે, જ્યાં વિવિધ સત્તાવાર કાર્યક્રમો અને બેઠકોમાં ભાગ લેશે. ત્યારબાદ ડિબ્રુગઢ પરત ફરી આસામ સરકારના વરિષ્ઠ અધિકારીઓ સાથે સમીક્ષા બેઠક કરશે. બેઠકમાં પૂરગ્રસ્ત વિસ્તારોમાં આરોગ્ય સેવાઓ, તબીબી માળખાની પુનઃસ્થાપના, રાહત શિબિરોમાં સુવિધાઓ અને ચેપી રોગોના નિવારણ અંગે ચર્ચા થવાની શક્યતા છે.

6 ઓગસ્ટે નડ્ડા અરુણાચલ પ્રદેશના કેयी પેન્યોર જિલ્લાના યાઝાલી પહોંચશે. અહીં તેઓ આરોગ્ય સેવાઓનું નિરીક્ષણ કરી સ્થાનિક વહીવટીતંત્ર અને આરોગ્ય અધિકારીઓ સાથે ચર્ચા કરશે.

પ્રવાસ દરમિયાન પૂર અને ભૂસ્ખલન બાદ ઉભા થયેલા આરોગ્ય પડકારો, દવાઓની ઉપલબ્ધતા, રોગચાળાની દેખરેખ અને તબીબી રાહત કામગીરીની સમીક્ષા કરવામાં આવશે. કેન્દ્ર અને રાજ્ય સરકારો વચ્ચે સંકલન વધારવા માટે પણ આ પ્રવાસ મહત્વપૂર્ણ માનવામાં આવી રહ્યો છે.