તેહરાન: અમેરિકા અને ઈરાન વચ્ચે બે સપ્તાહના સીઝફાયર (યુદ્ધવિરામ) બાદ ફરી એકવાર તણાવ ચરમસીમાએ પહોંચ્યો છે. હોર્મુઝ સ્ટ્રેટમાં બંને પક્ષો તરફથી હુમલાઓ ફરી શરૂ થઈ ગયા છે. આ ગંભીર સ્થિતિ વચ્ચે ઈરાનના પ્રથમ ઉપરાષ્ટ્રપતિ મોહમ્મદ રઝા આરેફે મોટો દાવો કર્યો છે કે ઈરાની જનતા ટૂંક સમયમાં અમેરિકા અને ઈઝરાયેલ સામેની આ જંગમાં ભવ્ય જીતની ઉજવણી કરશે.

ઉપરાષ્ટ્રપતિ આરેફે ગુરુવારે સ્વાસ્થ્ય સુવિધાઓ અને ઉદ્યોગોને થયેલા નુકસાનનું નિરીક્ષણ કરતી વખતે આ નિવેદન આપ્યું હતું. તેમણે ઉમેર્યું કે હોર્મુઝ સ્ટ્રેટ એ ઈરાનનો ખાસ વિસ્તાર છે અને દેશમાં પુનઃનિર્માણનું કાર્ય ઝડપથી આગળ વધી રહ્યું છે.

ટ્રમ્પનો કટાક્ષ: 'જો સીઝફાયર ન હોત તો ઈરાનમાંથી મોટી ચમક દેખાતી હોત' બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પે ગુરુવારે મીડિયા સાથેની વાતચીતમાં જણાવ્યું હતું કે હોર્મુઝ સ્ટ્રેટમાં નવી સૈન્ય અથડામણો છતાં ઈરાન સાથે સીઝફાયર હજુ પણ અમલમાં છે.

ટ્રમ્પનું નિવેદન: ટ્રમ્પે કટાક્ષ કરતા કહ્યું, "જો સીઝફાયર ન હોત, તો તમને તરત જ ખબર પડી ગઈ હોત. તમારે બસ ઈરાન તરફથી ઉઠતી એક મોટી ચમક જોવાની રહી હોત".

અમેરિકાનો પ્રસ્તાવ: ટ્રમ્પે એ વાતનો પણ ખુલાસો કર્યો કે અમેરિકા દ્વારા આપવામાં આવેલો પ્રસ્તાવ માત્ર એક પાનાનો નથી પણ ઘણો વ્યાપક છે. આ પ્રસ્તાવ મુજબ ઈરાન પાસે પરમાણુ હથિયારો નહીં હોય અને તેઓ ન્યુક્લિયર ડસ્ટ સહિતની વસ્તુઓ અમેરિકાને સોંપશે.

હાલમાં તેહરાન પાકિસ્તાની મધ્યસ્થીઓ દ્વારા વોશિંગ્ટનથી મળેલા આ સંદેશાની સમીક્ષા કરી રહ્યું છે.