અમેરિકા: મધ્ય પૂર્વમાં ફરી એકવાર તણાવ ચરમસીમાએ પહોંચ્યો છે. ઈરાને દાવો કર્યો છે કે તેણે દક્ષિણ બુશહેર પ્રાંત નજીક ઘૂસણખોરી કરનાર અમેરિકી ડ્રોનને એર ડિફેન્સ સિસ્ટમ દ્વારા તોડી પાડ્યો છે. આ ઘટનાને પગલે ખાડી વિસ્તારમાં સુરક્ષા ચિંતાઓ વધુ વધી ગઈ છે.

બુશહેર નજીક એર ડિફેન્સ સિસ્ટમ થઈ સક્રિય

ઈરાની મીડિયા રિપોર્ટ્સ અનુસાર, ગુરુવાર રાત્રે બુશહેર વિસ્તારમાં એર ડિફેન્સ સિસ્ટમ સક્રિય કરવામાં આવી હતી. અર્ધ-સરકારી સમાચાર એજન્સી તસ્નીમના જણાવ્યા મુજબ, ઈરાનની મિસાઇલ સિસ્ટમ દ્વારા અમેરિકી ડ્રોનને નિશાન બનાવી તોડી પાડવામાં આવ્યો હતો.

ઈરાને દક્ષિણ વિસ્તારમાંથી મિસાઇલ ફાયરિંગ કર્યું

સમાચાર એજન્સી ફાર્સના અહેવાલ મુજબ, ઈરાની સેનાએ દેશના દક્ષિણ વિસ્તારોમાંથી કેટલાક ટાર્ગેટ્સ પર મિસાઇલ ફાયરિંગ પણ કર્યું હતું. સ્થાનિક સૂત્રોએ ખાડી વિસ્તારમાં અથડામણ જેવી સ્થિતિ સર્જાવાની શક્યતા વ્યક્ત કરી છે.

હોર્મુઝ સ્ટ્રેટ પાસે જહાજોને ચેતવણી

ઈરાની સમાચાર એજન્સી મેહર અનુસાર, હોર્મુઝ જળમાર્ગ નજીક ઈરાની સેનાએ ચાર જહાજો પર ચેતવણીરૂપ ફાયરિંગ કર્યું હતું. દાવો કરવામાં આવ્યો છે કે આ જહાજો ઈરાન સાથે સંકલન કર્યા વગર જળમાર્ગ પાર કરવાનો પ્રયાસ કરી રહ્યા હતા.

બંદર અબ્બાસમાં ધડાકાના અહેવાલ

ગુરુવારે વહેલી સવારે ઈરાનના બંદર અબ્બાસ શહેરના પૂર્વીય વિસ્તારમાં ત્રણ વિસ્ફોટોના અવાજ સંભળાયા હોવાનું સ્થાનિક મીડિયા દ્વારા જણાવાયું હતું. ત્યારબાદ અમેરિકી મીડિયા રિપોર્ટ્સમાં દાવો થયો કે અમેરિકી સેનાએ રાત્રિ દરમિયાન ઈરાનના કેટલાક સૈન્ય ઠેકાણાઓ પર હુમલા કર્યા હતા.

અમેરિકી હુમલાના જવાબમાં ઈરાનની કાર્યવાહી

ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC)એ દાવો કર્યો છે કે અમેરિકી હુમલાના જવાબમાં બંદર અબ્બાસ નજીક આવેલા અમેરિકી એરબેઝને નિશાન બનાવવામાં આવ્યો હતો.

યુદ્ધવિરામ છતાં તણાવ યથાવત

માહિતી મુજબ, ઈરાન, અમેરિકા અને ઇઝરાયલ વચ્ચે 40 દિવસ ચાલેલા સંઘર્ષ બાદ 8 એપ્રિલે યુદ્ધવિરામ પર સહમતિ થઈ હતી. ત્યારબાદ પાકિસ્તાનની મધ્યસ્થતામાં ઈસ્લામાબાદમાં શાંતિ વાટાઘાટો યોજાઈ હતી, પરંતુ હજી સુધી કોઈ અંતિમ સમજૂતી થઈ શકી નથી.

24 અબજ ડોલરના ફ્રીઝ ફંડનો મુદ્દો ગરમાયો

ઈરાને અમેરિકા સમક્ષ પોતાના 24 અબજ ડોલરના ફ્રીઝ ફંડ મુક્ત કરવાની માંગ પણ ઉઠાવી છે. ઈરાની મીડિયા મુજબ, યુદ્ધ સમાપ્ત કરવા ચાલી રહેલી ચર્ચાઓ દરમિયાન આ મુદ્દો મુખ્ય ચર્ચાનો વિષય બન્યો છે.

વૈશ્વિક સ્તરે વધતી ચિંતા

હોર્મુઝ જળમાર્ગ વિશ્વ માટે અત્યંત મહત્વપૂર્ણ માનવામાં આવે છે, કારણ કે વિશ્વના મોટા પ્રમાણમાં તેલ અને ગેસનો પુરવઠો આ માર્ગ પરથી પસાર થાય છે. હાલની પરિસ્થિતિને કારણે વૈશ્વિક બજારો અને ઊર્જા સુરક્ષા પર ફરી અનિશ્ચિતતા ઊભી થઈ છે.