હોર્મુઝ જળમાર્ગ પાર કરી ભારત તરફ આગળ વધ્યો તેલ ટૅન્કર મધ્ય પૂર્વમાં વધતા તણાવ વચ્ચે ભારત માટે મોટી રાહતના સમાચાર સામે આવ્યા છે. ભારત માટે પેટ્રોલિયમ લઈને આવતું એક વિશાળ તેલ ટૅન્કર સફળતાપૂર્વક હોર્મુઝ જળમાર્ગ પાર કરી ચૂક્યું છે. સમુદ્રી ટ્રેકિંગ વેબસાઇટ્સ મુજબ હવે આ જહાજ ભારત તરફ આગળ વધી રહ્યું છે અને 3 જૂને વિશાખાપટ્ટનમ બંદરે પહોંચવાની શક્યતા છે.

‘નિસોસ કેરોસ’ નામનું ટૅન્કર ભારત તરફ આગળ વધ્યું

‘નિસોસ કેરોસ’ નામનું આ ઓઈલ ટૅન્કર 21 મેના રોજ શારજાહથી રવાના થયું હતું. માર्शલ આઇલેન્ડ્સના ધ્વજ હેઠળ ચાલતું આ જહાજ હાલમાં ભારતના પશ્ચિમ કિનારા નજીક ઉત્તર અરબી સમુદ્ર વિસ્તારમાં જોવા મળ્યું હોવાનું માહિતી મળી છે.

ઈરાને 24 કલાકમાં 23 જહાજોને આપી મંજૂરી

ઈરાનની સમાચાર એજન્સી IRNA મુજબ, ઇસ્લામિક રેવોલ્યુશનરી ગાર્ડ કોર્પ્સે છેલ્લા 24 કલાકમાં 23 કોમર્શિયલ જહાજોને હોર્મુઝ જળમાર્ગમાંથી પસાર થવાની મંજૂરી આપી હતી. તેમાં ઓઈલ ટૅન્કર અને કન્ટેનર જહાજોનો પણ સમાવેશ થાય છે.

જહાજોની અવરજવર માટે ઈરાન સાથે કરવું પડે છે સંકલન

રિપોર્ટ મુજબ, હોર્મુઝ જળમાર્ગમાંથી પસાર થનારા તમામ જહાજોને ઈરાની નેવલ અધિકારીઓ સાથે સત્તાવાર સંકલન કરવું પડી રહ્યું છે. જોકે, આ માટે કોઈ ખાસ ફી વસૂલવામાં આવી છે કે નહીં તે હજી સ્પષ્ટ થયું નથી.

ઈરાને પહેલેથી આપી હતી ચેતવણી

ઈરાને અગાઉ જાહેરાત કરી હતી કે હોર્મુઝ જળમાર્ગમાંથી પસાર થનારા જહાજો પાસેથી ફી લેવામાં આવી શકે છે. આ માટે ઈરાને ‘પર્શિયન ગલ્ફ સ્ટ્રેટ ઓથોરિટી’ નામની નવી એજન્સી બનાવવાની જાહેરાત પણ કરી હતી.

અમેરિકા અને ઈરાન વચ્ચે વધ્યો તણાવ

હોર્મુઝ જળમાર્ગને લઈને અમેરિકા અને ઈરાન વચ્ચે તણાવ સતત વધી રહ્યો છે. અમેરિકા દ્વારા ઈરાનને આ જળમાર્ગમાં મુક્ત અવરજવર ફરી શરૂ કરવાની માંગ કરવામાં આવી છે. અમેરિકી રાષ્ટ્રપતિ Donald Trump એ પણ નિવેદન આપ્યું કે “આ જળમાર્ગ તમામ દેશો માટે ખુલ્લો રહેશે.”

વિશ્વના 20 ટકા તેલ પુરવઠા પર અસર

હોર્મુઝ જળમાર્ગ વિશ્વ માટે અત્યંત મહત્વપૂર્ણ માનવામાં આવે છે. વિશ્વના અંદાજે 20 ટકા ગેસ અને તેલનો પુરવઠો આ જ માર્ગ પરથી પસાર થાય છે. ઈરાનની કાર્યવાહીથી વૈશ્વિક ઊર્જા બજારમાં અનિશ્ચિતતા અને આર્થિક ચિંતાઓ વધી ગઈ છે.

333 મીટર લાંબું વિશાળ ટૅન્કર

સમુદ્રી માહિતી સંસ્થા અનુસાર ‘નિસોસ કેરોસ’ જહાજનું માલિકાણું Arethusa Shipping Corporation પાસે છે અને તેનું સંચાલન Kyklades Maritime Corporation કરે છે. Hyundai દ્વારા બનાવવામાં આવેલું આ ટૅન્કર 333 મીટર લાંબું છે અને તેની ક્ષમતા અંદાજે 3.18 લાખ ટન જેટલી છે.