IPL 2026 Live in Bangladesh: ઇન્ડિયન પ્રીમિયર લીગ 2026ની શરૂઆત રોયલ ચેલેન્જર્સ બેંગ્લોર અને સનરાઇઝર્સ હૈદરાબાદ વચ્ચેની મેચથી થશે. આ IPLની 19મી સિઝન છે અને આ ટુર્નામેન્ટનું વિશ્વભરમાં પ્રસારણ થાય છે. જો કે, ICC T20 વર્લ્ડ કપ 2026 પર મતભેદોને કારણે બાંગ્લાદેશે દેશમાં IPL પ્રસારણ પર પ્રતિબંધ મૂકવાની જાહેરાત કરી હતી, પરંતુ હવે તેણે પોતાનો નિર્ણય પાછો ખેંચી લીધો છે.

બાંગ્લાદેશ સરકારે નિર્ણય લીધો છે કે, IPL 2026ની મેચો દેશમાં પ્રસારિત કરવામાં આવશે. મુસ્તફિઝુર રહેમાનને ટુર્નામેન્ટમાંથી બાકાત રાખવાના વિવાદને કારણે બંને દેશો વચ્ચે તણાવ વધ્યો હતો અને બાંગ્લાદેશે IPL પર સંપૂર્ણ પ્રતિબંધ લાદ્યો હતો, તેના બે મહિના પછી આ નિર્ણય લેવામાં આવ્યો છે. બાંગ્લાદેશના નવા માહિતી અને પ્રસારણ મંત્રી ઝહીરુદ્દીન સ્વપને આ જાહેરાત કરી હતી.

KKRએ મુસ્તફિઝુર રહેમાનને રિલીઝ કર્યો
મુસ્તફિઝુર રહેમાનને કોલકાતા નાઈટ રાઈડર્સે ₹9.2 કરોડ (₹92 મિલિયન) માં ખરીદ્યો હતો, પરંતુ BCCIના નિર્દેશ પર તેને કાઢી નાંખવામાં આવ્યો હતો. બાંગ્લાદેશમાં હિન્દુ લઘુમતીઓની હત્યા બાદ BCCIએ ટીમને મુસ્તફિઝુર રહેમાનને કાઢવા કહ્યું હતું. આ ઘટના બાદ બાંગ્લાદેશ ક્રિકેટ બોર્ડ અને BCCI વચ્ચેના સંબંધો બગડ્યા હતા. જેના કારણે બાંગ્લાદેશ T20 વર્લ્ડ કપમાંથી ખસી ગયું હતું.

પ્રતિબંધ હટાવવાથી બાંગ્લાદેશના કેબલ ઓપરેટરો ખુશ
પ્રોફેસર યુનુસના નેતૃત્વ હેઠળની વચગાળાની સરકાર દ્વારા IPL પ્રસારણ પર પ્રતિબંધ લગાવવાના અનિશ્ચિતતા પછી આ નિર્ણય લેવામાં આવ્યો છે. બાંગ્લાદેશના કેબલ ઓપરેટર્સ એસોસિએશનએ પણ આ નિર્ણયને ટેકો આપ્યો હતો. સેક્રેટરી રેઝાઉલ કરીમ લાબ્લૂએ પુષ્ટિ આપી હતી કે, દેશમાં હવે IPL પ્રસારણ પર પ્રતિબંધ નથી. લાબ્લૂએ જણાવ્યું હતું કે, વચગાળાની સરકારના અગાઉના નિર્દેશો હવે અમલમાં નથી.