મુંબઈ: મુંબઈ ઇન્ડિયન્સએ વાનખેડે સ્ટેડિયમમાં રમાયેલા મુકાબલામાં લખનૌ સુપર જાયન્ટ્સને 6 વિકેટથી હરાવ્યું. 228 રનનો લક્ષ્યાંક સફળતાપૂર્વક ચેઝ કરી એમઆઈએ આઇપીએલ ઇતિહાસમાં પોતાની સૌથી મોટી રનચેઝ જીત નોંધાવી.

પ્રથમ બેટિંગ કરતા એલએસજીએ નિકોલસ પૂરણના ઝડપી 63 રનની મદદથી 5 વિકેટે 228 રન બનાવ્યા. જવાબમાં એમઆઈ માટે રોહિત શર્મા (84) અને રાયન રિકલ્ટન (83)એ શાનદાર શરૂઆત આપતા પહેલા વિકેટ માટે 143 રનની ભાગીદારી નોંધાવી.

અંતમાં નમન ધીર (23*) અને વિલ જેક્સ (10*)એ ટીમને જીત સુધી પહોંચાડી. રિકલ્ટનને પ્લેયર ઓફ ધ મેચ જાહેર કરવામાં આવ્યા.

આ જીત સાથે એમઆઈ આઇપીએલમાં 200 કે તેથી વધુ લક્ષ્યાંક સફળતાપૂર્વક ચેઝ કરનાર બીજી સૌથી સફળ ટીમ બની છે. એમઆઈએ અત્યાર સુધી 7 વખત આ સિદ્ધિ હાંસલ કરી છે.

આ યાદીમાં પંજાબ કિંગ્સ 11 વખત સાથે ટોચ પર છે, જ્યારે રાજસ્થાન રોયલ્સ અને સનરાઇઝર્સ હૈદરાબાદ 6-6 વખત સાથે પાછળ છે. રોયલ ચેલેન્જર્સ બેંગલુરુએ 5 વખત 200થી વધુ લક્ષ્યાંક ચેઝ કર્યો છે.