જામનગર: શહેરના વિકાસને વધુ ગતિ આપવા માટે જામનગર મહાનગરપાલિકાની સ્ટેન્ડિંગ કમિટીએ મહત્વપૂર્ણ નિર્ણયોની મંજૂરી આપી છે. ચેરમેન ધીરેન મોનાણીના અધ્યક્ષસ્થાને યોજાયેલી બેઠકમાં શહેરના વિવિધ વિકાસકામો માટે અંદાજે રૂ. 3 કરોડ 80 લાખના ખર્ચને મંજૂરી આપવામાં આવી છે. બેઠકમાં સૌથી મહત્વપૂર્ણ નિર્ણય વોર્ડ નંબર-7માં સી.સી. રોડ અને પેવર બ્લોકના કામો માટે રૂ. 2 કરોડની ફાળવણી કરવાનો રહ્યો હતો. આ કામો પૂર્ણ થયા બાદ સ્થાનિક નાગરિકોને વધુ સારી માર્ગ સુવિધા મળશે અને વિસ્તારના ઈન્ફ્રાસ્ટ્રક્ચરમાં નોંધપાત્ર સુધારો થશે. 

આ ઉપરાંત શહેરની પાયાની સુવિધાઓને વધુ મજબૂત બનાવવા માટે સ્ટ્રીટ લાઈટ જાળવણી, રોડ સ્વીપર મશીન, વોટર વર્ક્સ અને લાઈટીંગ સંબંધિત વિવિધ કામો માટે પણ લાખો રૂપિયાની મંજૂરી આપવામાં આવી છે. બેઠકમાં મનપાના ભંગાર સામાનના વેચાણ અંગે પણ ચર્ચા કરવામાં આવી હતી. મનપાને આ વેચાણથી અંદાજે રૂ. 10 લાખની આવક થવાની શક્યતા હોવાનું જણાવાયું છે. સ્ટેન્ડિંગ કમિટીના આ નિર્ણયો શહેરમાં વિકાસકાર્યોને નવી દિશા આપશે અને નાગરિકોને વધુ સારી સુવિધાઓ ઉપલબ્ધ કરાવવામાં મદદરૂપ બનશે.