અમદાવાદ |  ગુજરાત એન્ટી ટેરરિઝમ સ્ક્વોડ (ATS)એ આતંકવાદી વિચારધારા પ્રેરિત રાષ્ટ્રવિરોધી પ્રવૃત્તિઓની સાજિશમાં સંડોવાયેલા બે શખ્સોને ઝડપી પાડ્યા છે. અધિકારીઓ મુજબ, આરોપીઓ દેશવિરોધી કાવતરું રચી રહ્યા હતા.

મળતી માહિતી મુજબ, પાટણ જિલ્લાના સિદ્ધપુરનો રહેવાસી 22 વર્ષીય ઇરફાન કાલેખાન પઠાણ પર શંકા થતાં ATSએ કાર્યવાહી હાથ ધરી હતી. તે કટ્ટરપંથી વિચારધારાનો પ્રચાર કરી રહ્યો હતો અને ભારત સરકાર વિરુદ્ધ સશસ્ત્ર બળવો કરવાની યોજના બનાવી રહ્યો હતો.

ATSએ તેને કસ્ટડીમાં લઈને પૂછપરછ હાથ ધરી હતી. પ્રાથમિક તપાસ દરમિયાન તેના મોબાઈલ ફોનની તપાસ કરતાં જાણવા મળ્યું કે તે વોટ્સએપ અને ઇન્સ્ટાગ્રામ મારફતે આતંકવાદી સંગઠન ISIS તથા અન્ય કટ્ટરપંથી જૂથો સાથે સંપર્કમાં હતો. આગળની તપાસ અને ડિજિટલ પુરાવાના આધારે ATSએ તેના સાથીદાર તરીકે 21 વર્ષીય ખુરશિદ ઝાહિદ અખ્તર શેખને ઓળખ્યો હતો, જેને મહારાષ્ટ્ર પોલીસની મદદથી મુંબઈના સાકીનાકા વિસ્તારમાંથી ઝડપી પાડવામાં આવ્યો હતો.

સાજિશનો ખુલાસો  ATSના જણાવ્યા મુજબ, બંને આરોપીઓ ભારતમાં “ગઝવા-એ-હિંદ” સ્થાપિત કરવાની દિશામાં કાર્યરત હતા. તેઓ જેહાદ માટે લોકોને ઉશ્કેરવા અને કટ્ટરપંથી નેટવર્ક ઉભું કરવાની યોજના બનાવી રહ્યા હતા.

તેમની યોજનાઓમાં નીચે મુજબના મુદ્દાઓ સામેલ હતા: રાજકીય નેતાઓ તેમજ RSS સાથે જોડાયેલા લોકો પર નિશાન સાધીને હુમલા કરવાની યોજના RDX સહિતના વિસ્ફોટકો તૈયાર કરવાની અને હથિયારોના ઉપયોગ માટે તાલીમ આપવાની તૈયારી
ISIS અને અન્ય આતંકવાદી સંગઠનોના સંપર્કથી પાકિસ્તાન અને અફઘાનિસ્તાનમાંથી હથિયારો મંગાવવાનો પ્રયાસ હિંસક માર્ગ અપનાવી દેશમાં શરિયત કાયદો લાગુ કરવાની યોજના તપાસ અને કાનૂની કાર્યવાહી

ATSએ સામાજિક માધ્યમો પર નજર રાખીને તથા માનવ સૂત્રોના આધારે આરોપીઓની હરકતો પર નજર રાખી હતી. તેમના મોબાઈલમાંથી રાષ્ટ્રવિરોધી પ્રવૃત્તિઓની યોજના સંબંધિત ચેટ્સ તેમજ વાંધાજનક સામગ્રી મળી આવી છે. આ મામલે ATS પોલીસ સ્ટેશનમાં ભારતીય ન્યાય સંહિતાની કલમ 61 અને 148 હેઠળ ગુનો નોંધવામાં આવ્યો છે. કોર્ટ દ્વારા બંને આરોપીઓને 11 દિવસના પોલીસ રિમાન્ડ પર મોકલવામાં આવ્યા છે. આ કેસમાં અન્ય સંડોવાયેલા લોકોની શોધખોળ માટે વધુ તપાસ ચાલુ છે.