ગાંધીનગર: માણસા તાલુકાના પુંધરા ગામે ગુરુવારે જમીનમાંથી પસાર થતી ગેસ લાઇનમાં અચાનક આગ લાગવાની ઘટના સામે આવી છે. કાળઝાળ ગરમીના પ્રકોપ વચ્ચે બનેલી આ ઘટનાથી વિસ્તારમાં ભારે દહેશત ફેલાઈ ગઈ હતી.

પ્રાથમિક માહિતી મુજબ ગેસ લાઇનમાં દબાણ વધવાના કારણે પ્રચંડ ધડાકો થયો હતો અને ત્યારબાદ આગ ભભૂકી ઊઠી હતી. ઘટનાને પગલે મહુડી–પેથાપુર હાઈવે નજીક આકાશમાં આગના ઊંચા ગોળા જોવા મળ્યા હતા, જેને કારણે સ્થાનિકોમાં ભયનો માહોલ સર્જાયો હતો.

ગેસ પાઈપલાઇનમાં આગ લાગતા આસપાસના વિસ્તારમાં અફરાતફરી ફેલાઈ ગઈ હતી અને લોકો સલામત જગ્યાએ દોડી ગયા હતા.

પ્રાથમિક તપાસમાં ગેસ લાઇનમાં વધેલા દબાણને કારણે આ દુર્ઘટના બની હોવાનું સામે આવ્યું છે. તંત્ર દ્વારા ઘટનાની વધુ તપાસ હાથ ધરવામાં આવી છે.