કોમનવેલ્થ સ્પોર્ટ્સ ટીમની પ્રથમવાર ગુજરાત મુલાકાત: અમદાવાદ, ગાંધીનગર અને વડોદરાના સ્પોર્ટ્સ ઈન્ફ્રાસ્ટ્રક્ચરનું થશે નિરીક્ષણ; ફેડરેશનના પ્રેસિડેન્ટે CMને ગ્લાસગો ગેમ્સનું આપ્યું આમંત્રણ ગાંધીનગર: ગુજરાત હવે માત્ર ઉદ્યોગોમાં જ નહીં, પણ રમતગમતના ક્ષેત્રે પણ વિશ્વ ફલક પર ચમકવા માટે તૈયાર છે. રાજ્યના પાટનગર ગાંધીનગરમાં પ્રથમવાર કોમનવેલ્થ સ્પોર્ટ્સ ટીમની ઐતિહાસિક મુલાકાત યોજાઈ હતી. આ મુલાકાત દરમિયાન ટીમ દ્વારા મુખ્યમંત્રી ભૂપેન્દ્ર પટેલ સાથે એક ઉચ્ચ સ્તરીય શુભેચ્છા બેઠક યોજવામાં આવી હતી. આ બેઠક આગામી વર્ષ 2030માં યોજાનારી શતાબ્દી કોમનવેલ્થ ગેમ્સના યજમાન તરીકે ગુજરાતની દાવેદારી માટે અત્યંત મહત્વની માનવામાં આવી રહી છે.

ગુણવત્તાસભર આયોજન માટે ગુજરાત કટિબદ્ધ બેઠક દરમિયાન મુખ્યમંત્રી ભૂપેન્દ્ર પટેલે મક્કમ આત્મવિશ્વાસ સાથે જણાવ્યું હતું કે, ગુજરાત સરકાર કોઈપણ મોટા વૈશ્વિક આયોજનને સફળ બનાવવા માટે સક્ષમ છે. તેમણે ઉમેર્યું કે, "જો ગુજરાતને તક મળશે, તો અમે ટાઈમ બાઉન્ડ (સમય મર્યાદામાં) અને આંતરરાષ્ટ્રીય કક્ષાના ગુણવત્તાસભર આયોજન સાથે શતાબ્દી કોમનવેલ્થ ગેમ્સનું આયોજન કરીશું." મુખ્યમંત્રીએ રાજ્યમાં વિકસી રહેલા અત્યાધુનિક સ્પોર્ટ્સ ઈન્ફ્રાસ્ટ્રક્ચરની વિગતો પણ ટીમ સમક્ષ રજૂ કરી હતી.

અમદાવાદ-વડોદરામાં રમતગમતના સ્થળોનું નિરીક્ષણ
આ મુલાકાત માત્ર બેઠક પૂરતી સીમિત નથી. કોમનવેલ્થ સ્પોર્ટ્સ ટીમ આગામી દિવસોમાં અમદાવાદ, ગાંધીનગર અને વડોદરાના વિવિધ રમતગમતના સ્થળો અને સ્પોર્ટ્સ સંકુલની મુલાકાત લેશે. ટીમ અહીંની સુવિધાઓ, સ્ટેડિયમની ક્ષમતા અને ખેલાડીઓ માટેના ઈન્ફ્રાસ્ટ્રક્ચરનું બારીકાઈથી નિરીક્ષણ કરશે. આ નિરીક્ષણ બાદ ટીમ પોતાનો અહેવાલ રજૂ કરશે.

PM મોદીની વિઝનરી લીડરશીપના વખાણ કોમનવેલ્થ સ્પોર્ટ્સ ફેડરેશનના પ્રેસિડેન્ટે પ્રધાનમંત્રી નરેન્દ્ર મોદીની 'વિઝનરી લીડરશીપ' અને રમતગમત પ્રત્યેના તેમના પ્રોત્સાહનના મુક્ત મને વખાણ કર્યા હતા. આ પ્રસંગે તેમણે મુખ્યમંત્રી ભૂપેન્દ્ર પટેલને આગામી ગ્લાસગો ગેમ્સ જોવા માટેનું ખાસ આમંત્રણ પણ પાઠવ્યું હતું.

સ્પોર્ટ્સ જગતના દિગ્ગજોની હાજરી  આ બેઠકમાં ઈન્ડિયન ઓલિમ્પિક એસોસિએશન (IOA) ના વરિષ્ઠ પદાધિકારીઓ પણ જોડાયા હતા. રાજ્ય સરકારના રમતગમત વિભાગના ઉચ્ચ અધિકારીઓએ પણ આ પ્રોજેક્ટ અંગે પ્રેઝન્ટેશન આપ્યું હતું. જો આ યોજના સફળ થશે, તો 2030 માં ગુજરાત વિશ્વના સૌથી પ્રતિષ્ઠિત રમત ઉત્સવોમાંના એક એવા કોમનવેલ્થ ગેમ્સની યજમાની કરતું જોવા મળશે, જે રાજ્ય માટે ગૌરવની ક્ષણ હશે.