ન્યૂ દિલ્હી: અમેરિકા ખાતે રાષ્ટ્રપતિ ડોનાલ્ડ ટ્રમ્પ અને તેમના પરિવારની સુરક્ષા ફરી એકવાર ચર્ચામાં આવી છે. 2026 દરમિયાન અત્યાર સુધી ટ્રમ્પ અને તેમના પરિવારને નિશાન બનાવીને કરવામાં આવેલી ચાર અલગ-અલગ મોટી સાજિશોને અમેરિકાની સુરક્ષા એજન્સીઓએ નિષ્ફળ બનાવી હોવાનું સામે આવ્યું છે. આ ઘટનાઓ બાદ સિક્રેટ સર્વિસ, FBI અને અન્ય એજન્સીઓ સંપૂર્ણ એલર્ટ પર છે.

મળતી માહિતી મુજબ, ફેબ્રુઆરી 2026માં ફ્લોરિડા સ્થિત ટ્રમ્પના માર-એ-લાગો રિસોર્ટમાં ઘુસણખોરીનો પ્રયાસ થયો હતો, જેમાં હથિયાર સાથે આવેલા એક યુવકને સુરક્ષા દળોએ ઠાર માર્યો હતો. ત્યારબાદ મે મહિનામાં વ્હાઇટ હાઉસ નજીક ફાયરિંગની ઘટના બની હતી, જેમાં હુમલાખોરને જવાબી કાર્યવાહી દરમિયાન ઠાર કરવામાં આવ્યો હતો.

આ ઉપરાંત વ્હાઇટ હાઉસ કોરીસ્પોન્ડન્ટ્સ ડિનર દરમિયાન પણ હુમલાનો પ્રયાસ થયો હતો, જ્યાં એક શખ્સે અચાનક ફાયરિંગ કરતા અફરાતફરી મચી ગઈ હતી, જોકે ટ્રમ્પ સહિત તમામ મહેમાનોને સુરક્ષિત બહાર કાઢવામાં આવ્યા હતા.

રિપોર્ટ્સ અનુસાર, ટ્રમ્પની દીકરી ઇવાંકા ટ્રમ્પને પણ નિશાન બનાવવાની એક આતંકી સાજિશનો ખુલાસો થયો છે, જેને ઈરાન સમર્થિત સંગઠન સાથે જોડવામાં આવી રહી છે.

તાજેતરમાં 23 મેના રોજ વ્હાઇટ હાઉસ નજીક ફરી એકવાર ગોળીબારની ઘટના સામે આવી હતી. હુમલાખોરે અચાનક ફાયરિંગ શરૂ કરતા સિક્રેટ સર્વિસે જવાબી કાર્યવાહી કરી અને તેને ઠાર કર્યો. આ ઘટનામાં એક સામાન્ય નાગરિક પણ ઘાયલ થયો છે.

એક પછી એક ઘટનાઓને કારણે અમેરિકાની રાજધાની વોશિંગ્ટનમાં સુરક્ષા વ્યવસ્થા પર મોટા સવાલો ઉભા થયા છે. હાલ FBI સહિતની એજન્સીઓ તમામ કેસોની તપાસમાં જોડાઈ ગઈ છે અને હાઈ એલર્ટ જાહેર કરવામાં આવ્યું છે.