અમદાવાદ : અમદાવાદ મ્યુનિસિપલ કોર્પોરેશન (AMC) દ્વારા મે મહિનામાં શહેરભરમાં હાથ ધરાયેલી ખાદ્ય સુરક્ષા ચકાસણીમાં ચોંકાવનારો ખુલાસો સામે આવ્યો છે. ફૂડ સેફ્ટી એન્ડ સ્ટાન્ડર્ડ્સ એક્ટ હેઠળ લેવામાં આવેલા કુલ 28 ફૂડ સેમ્પલ અનસેફ અથવા સબસ્ટાન્ડર્ડ હોવાનું સામે આવ્યું છે.

AMC અનુસાર, કુલ 28માંથી 9 નમૂનાઓ માનવ આરોગ્ય માટે અસુરક્ષિત (unsafe) જાહેર કરવામાં આવ્યા છે, જ્યારે 19 નમૂનાઓ ગુણવત્તાની દ્રષ્ટિએ નબળા (substandard) હોવાનું જાણવા મળ્યું છે. આથી શહેરમાં ખાદ્ય પદાર્થોની ગુણવત્તા અને સ્વચ્છતા મુદ્દે ગંભીર પ્રશ્નો ઉભા થયા છે.

ચકાસણીમાં કરણાવતી દાબેલી અને પાલડી જ્યુસ સેન્ટર સહિત અનેક જાણીતા અને સામાન્ય ખાણીપીણીના સ્ટોલ પણ સામેલ હતા.

અસુરક્ષિત નમૂનાઓમાં નિકોલ સ્થિત સેફાયર ફૂડ્સ ઇન્ડિયા લિમિટેડમાંથી લેવાયેલ બર્ન્ટ ઓઇલ, મંગલમૂર્તિ ગાય ઘી, મધુપુરા ગોડાઉનનું હળદર પાવડર, શાહીબાગની આઈસ્ક્રીમ દુકાનમાંથી મંગો મિલ્કશેક, મરચું પાવડર તથા ખોખરાની ડેરીમાંથી પનીર જેવા નમૂનાઓનો સમાવેશ થાય છે.

તે જ રીતે સબસ્ટાન્ડર્ડ નમૂનાઓમાં મનીનગરના રોડસાઇડ વેન્ડરનું પાણી પુરીનું પાણી, નવા વાડજ અને ખોખરાના સ્ટોલનું રગડા, બાપુનગરની હોસ્પિટલ કેન્ટીનનું હળદર પાવડર, સાઉથ બોપલના રેસ્ટોરન્ટનું ટોફુ, બાપુનગરના જ્યુસ સેન્ટરનું મેંગો જ્યુસ સહિત અનેક ખાદ્ય પદાર્થો સામેલ છે.

AMCની નિયમિત ફૂડ સેફ્ટી સર્વેલન્સ ડ્રાઈવ હેઠળ શહેરના પૂર્વ, પશ્ચિમ, ઉત્તર, દક્ષિણ, મધ્ય અને દક્ષિણ-પશ્ચિમ ઝોનમાંથી આ નમૂનાઓ લેવામાં આવ્યા હતા.