ધારી ખાતે આજે સવારે ભંગારના ડેલામાં અચાનક આગ લાગતા અફરાતફરીનો માહોલ સર્જાયો હતો. હરીપુરા રોડ નજીક બનેલી આ ઘટનાથી આસપાસના વિસ્તારમાં ભયનો માહોલ જોવા મળ્યો હતો.

માહિતી મુજબ, આગ લાગતાની સાથે જ આસપાસના લોકો તાત્કાલિક ઘટના સ્થળે દોડી આવ્યા હતા અને આગ પર કાબૂ મેળવવાનો પ્રયાસ શરૂ કર્યો હતો. આગ ધીમે ધીમે વિકરાળ સ્વરૂપ ધારણ કરતી જતા ફાયર વિભાગને જાણ કરવામાં આવી હતી.

જોકે, ધારી નગરપાલિકામાં ફાયર ફાઇટરની સુવિધા ઉપલબ્ધ ન હોવાને કારણે સ્થાનિક લોકોને જ આગ બુઝાવવા માટે પ્રયાસો કરવા પડ્યા હતા. લોકોએ પાણીની વ્યવસ્થા કરીને ભારે મહેનત બાદ આગ પર કાબૂ મેળવ્યો હતો.

સદનસીબે આ ઘટનામાં કોઈ જાનહાની થઈ નથી. જોકે આગના કારણે ભંગારના માલસામાનને નુકસાન પહોંચ્યું હોવાનું અનુમાન છે. આગ લાગવાના કારણો હજુ સુધી સ્પષ્ટ થયા નથી. પોલીસ અને સંબંધિત તંત્ર દ્વારા સમગ્ર મામલે તપાસ હાથ ધરવામાં આવી છે.

આગ લાગવાની સાથે આસપાસના વિસ્તારોમાં  ભયનો માહોલ જોવા મળી રહ્યો છે.