દ્વારકા: દ્વારકા શહેરમાં ગોમતી ઘાટ વિસ્તારમાં 13 કલાકની શોધખોળ બાદ યુવકનો મૃતદેહ મળી આવતા ચકચાર મચી ગઈ છે.

મળતી માહિતી મુજબ, વિશાલ પરમાર નામનો યુવક પરિવાર સાથે સામાજિક પ્રસંગે દ્વારકા આવ્યો હતો. ગોમતી ઘાટ પર આવેલા હનુમાન મંદિર નજીકથી તેનો મૃતદેહ દ્વારકા પોલીસની પેટ્રોલિંગ દરમિયાન મળી આવ્યો હતો.

ઘટના અંગે જાણ થતા ફાયર વિભાગની ટીમ તાત્કાલિક સ્થળે પહોંચી અને મૃતદેહને બહાર કાઢવાની કામગીરી હાથ ધરી હતી. બાદમાં મૃતદેહને દ્વારકા સરકારી હોસ્પિટલ ખાતે પોસ્ટમોર્ટમ માટે ખસેડવામાં આવ્યો હતો.

યુવકના ગુમ થયા બાદ છેલ્લા 13 કલાકથી નગરપાલિકા ફાયર વિભાગ અને પોલીસ દ્વારા સતત શોધખોળ કરવામાં આવી રહી હતી. આખરે શોધખોળ બાદ મૃતદેહ મળતાં પરિવાર પર દુઃખનો પહાડ તૂટી પડ્યો છે.

પોલીસે સમગ્ર મામલે વધુ તપાસ હાથ ધરી છે.