સુરત: સુરત શહેરના ઓલપાડ વિસ્તારમાં એક યુવકે નશાની હાલતમાં ભરબજારમાં આતંક મચાવતા વેપારીઓ અને સ્થાનિકોમાં ભયનો માહોલ સર્જાયો હતો. આરોપી યુવક તીક્ષ્ણ હથિયાર સાથે બજારમાં ફરી રહ્યો હતો અને દુકાનદારોને ખુલ્લેઆમ મારી નાખવાની ધમકીઓ આપી રહ્યો હતો.

માહિતી મુજબ, યુવકે પહેલા એક દુકાનદારને ધમકાવ્યો હતો. ત્યારબાદ નજીક આવેલી એક નોનવેજ દુકાન પર પહોંચી ત્યાં કામ કરતા વ્યક્તિને છરી બતાવી જાનથી મારી નાખવાની ધમકી આપી હતી. સમગ્ર ઘટના આસપાસ લાગેલા CCTV કેમેરામાં કેદ થઈ ગઈ હતી.

ઘટના બાદ વેપારીઓ અને સ્થાનિક લોકોએ ભારે રોષ વ્યક્ત કર્યો હતો. બનાવની જાણ થતાં પોલીસ તાત્કાલિક ઘટનાસ્થળે પહોંચી હતી અને મામલે તપાસ શરૂ કરી હતી.

સ્થાનિક વેપારીઓએ પોલીસમાં ફરિયાદ નોંધાવી આરોપી સામે કડક કાર્યવાહી કરવાની માંગ કરી છે. પોલીસે CCTV ફૂટેજના આધારે આરોપીની ઓળખ અને ધરપકડ માટે કાર્યવાહી હાથ ધરી છે.

વેપારીઓનું કહેવું છે કે ભરબજારમાં ખુલ્લેઆમ ધમકી આપનાર આવા તત્વો સામે કડક કાર્યવાહી કરવી જરૂરી છે જેથી લોકોમાં સુરક્ષાની ભાવના જળવાઈ રહે.