Dang Rain: દક્ષિણ ગુજરાતમાં ચોમાસાએ હવે વિધિવત્ દસ્તક આપી છે. ડાંગ જિલ્લાના મુખ્ય મથક આહવા ખાતે વાદળછાયા વાતાવરણ વચ્ચે વરસાદ વરસતા લોકોને અસહ્ય ગરમીમાંથી આંશિક રાહત મળી છે.

લાંબા વિરામ બાદ ડાંગ જિલ્લાના વઘઈ તાલુકામાં પણ વરસાદી માહોલ જામ્યો હતો. હવામાન વિભાગની આગાહી મુજબ સાકરપાતળ અને દગુનિયા ગામ સહિતના વિસ્તારોમાં ધોધમાર વરસાદ નોંધાયો હતો. મેઘરાજાની જોરદાર એન્ટ્રીથી ખેડૂતોમાં ખુશીની લાગણી જોવા મળી રહી છે.

વરસાદને કારણે ખેતી માટે અનુકૂળ વાતાવરણ સર્જાતા ખેડૂતોમાં ઉત્સાહનો માહોલ છે. આગામી દિવસોમાં વાવણીની કામગીરીને વેગ મળશે તેવી આશા વ્યક્ત કરવામાં આવી રહી છે. ગ્રામ્ય વિસ્તારોમાં વરસાદના આગમન સાથે ખુશીનું વાતાવરણ છવાઈ ગયું છે.

ખેડૂતોનું કહેવું છે કે સમયસર થયેલો વરસાદ ખેતી માટે આશીર્વાદ સમાન છે. ખેડૂતો માટે મેઘરાજાનો આ વરસાદ ખુશખબર બનીને આવ્યો છે. જેનાથી કૃષિ આધારિત અર્થતંત્રને પણ મોટો ફાયદો થવાની સંભાવના છે.