વડોદરા વડોદરા શહેરમાં મ્યુનિસિપલ કોર્પોરેશન ચૂંટણીની મતગણતરી પોલિટેકનિક કોલેજ ખાતે હાથ ધરાશે. મતગણતરીને ધ્યાનમાં રાખીને તંત્ર દ્વારા કડક સુરક્ષા બંદોબસ્ત ગોઠવવામાં આવ્યો છે. મતગણતરી કેન્દ્ર પર પોલીસનો ચુસ્ત પહેરો રાખવામાં આવ્યો છે જેથી સમગ્ર પ્રક્રિયા શાંતિપૂર્ણ રીતે પૂર્ણ થઈ શકે.
સ્ટ્રોંગ રૂમમાં સીલ કરાયેલા EVM મશીનો પર સીસીટીવી કેમેરાથી સતત નજર રાખવામાં આવી રહી છે. અધિકારીઓ દ્વારા 24 કલાક મોનીટરીંગ કરવામાં આવી રહ્યું છે જેથી કોઈ પણ પ્રકારની ગડબડ ન થાય. આ ચૂંટણીમાં શહેરમાં કુલ 53.34 ટકા મતદાન નોંધાયું હતું અને હવે 74 બેઠકો માટે 258 ઉમેદવારોનું ભાવિ EVM મશીનોમાં સીલ છે.
મતગણતરી કેન્દ્ર પર મતગણતરી પ્રક્રિયા સરળતાથી પૂર્ણ થાય તે માટે વિશેષ વ્યવસ્થા કરવામાં આવી છે. કયા વોર્ડની મતગણતરી કયા રૂમમાં થશે તેની વિગતવાર માહિતી દર્શાવતી યાદી પણ સ્થળ પર મુકવામાં આવી છે, જેથી ઉમેદવારો અને તેમના એજન્ટોને સરળતા રહે.
તંત્ર દ્વારા સમગ્ર પ્રક્રિયા પારદર્શક અને નિયમિત રીતે થાય તે માટે તમામ જરૂરી વ્યવસ્થાઓ કરવામાં આવી છે અને અધિકારીઓ સતત દેખરેખ રાખી રહ્યા છે.