નવી દિલ્હી : દેશની સૌથી મોટી અને પ્રતિષ્ઠિત મેડિકલ પ્રવેશ પરીક્ષા NEET-UG 2026 હવે દેશના સૌથી મોટા એજ્યુકેશન સ્કેમમાં ફેરવાઈ રહી છે. પેપર લીક કાંડમાં દરરોજ નવા અને ચોંકાવનારા ખુલાસા સામે આવી રહ્યા છે. રાજસ્થાન SOG અને CBIની તપાસમાં સામે આવ્યું છે કે પરીક્ષાના કલાકો પહેલા જ આશરે 600 માર્કસ સુધીના પ્રશ્નો સોશિયલ મીડિયા પર વાયરલ થઈ ગયા હતા. આ ખુલાસા બાદ દેશભરના 22 લાખથી વધુ વિદ્યાર્થીઓ અને વાલીઓમાં ભારે રોષ અને ચિંતા ફેલાઈ છે.

₹5 લાખથી શરૂ થયું ‘ડિલ’, અંતે ₹30 હજારમાં વહેંચાયું પેપર તપાસ એજન્સીઓના સૂત્રો અનુસાર, પેપર લીકનું આખું નેટવર્ક ખૂબ જ વ્યવસ્થિત રીતે કામ કરી રહ્યું હતું. શરૂઆતમાં કથિત ‘પ્રશ્ન બેંક’ અથવા અંદાજિત પેપર માટે ₹5 લાખ સુધીની માંગ કરવામાં આવી હતી. પરંતુ પરીક્ષા નજીક આવતાં આ જ સામગ્રી વોટ્સએપ અને અન્ય મેસેજિંગ એપ્સ મારફતે માત્ર ₹30 હજાર સુધીમાં વેચાવા લાગી હતી.

તપાસ દરમિયાન અનેક મોબાઈલ ફોનમાંથી “Forwarded many times” લખાણવાળા ડોક્યુમેન્ટ્સ મળી આવ્યા છે, જે દર્શાવે છે કે પેપર ખૂબ મોટા સ્તરે ફેલાઈ ગયું હતું. સીકરથી કેરળ સુધી જોડાયું કનેક્શન આ સમગ્ર કૌભાંડનું મુખ્ય કેન્દ્ર રાજસ્થાનનો સીકર જિલ્લો હોવાનું સામે આવ્યું છે. તપાસમાં ચુરુના એક યુવકનું નામ ખુલ્યું છે, જે હાલમાં કેરળની મેડિકલ કોલેજમાં MBBSનો અભ્યાસ કરી રહ્યો છે. આરોપ છે કે યુવકે 1 મેના રોજ સીકરમાં રહેતા પોતાના મિત્રને આ સામગ્રી મોકલી હતી, જ્યાંથી તે PG ઓપરેટરો, કરિયર કાઉન્સેલરો અને વિદ્યાર્થીઓ સુધી પહોંચાડી દેવામાં આવી.

CBI હવે આ યુવકના સંપર્કો અને ડિજિટલ કનેક્શન્સની તપાસમાં લાગી ગઈ છે.

140 પ્રશ્નો હૂબહૂ મળતા તપાસ એજન્સીઓ ચોંકી

તપાસનો સૌથી મોટો ધડાકો ત્યારે થયો જ્યારે વાયરલ થયેલી પ્રશ્ન બેંક અને મૂળ NEET પ્રશ્નપત્રની સરખામણી કરવામાં આવી. સૂત્રો અનુસાર, વાયરલ થયેલા દસ્તાવેજોમાં 300થી વધુ પ્રશ્નો હતા, જેમાંથી 140 પ્રશ્નો અસલી પરીક્ષાના પ્રશ્નપત્ર સાથે સંપૂર્ણ મેળ ખાતા હતા.

NEETમાં દરેક પ્રશ્ન 4 ગુણનો હોય છે. એટલે કે આશરે 560 થી 600 ગુણ સુધીનું પેપર પરીક્ષા પહેલા જ લીક થઈ ગયું હોવાની શક્યતા વ્યક્ત થઈ રહી છે. માત્ર પ્રશ્નો જ નહીં પરંતુ ઓપ્શનનો ક્રમ પણ સરખો હોવાનું સામે આવતા આ મામલો વધુ ગંભીર બન્યો છે.

ટેકનોલોજીનો સહારો લઈ ચલાવાયું નેટવર્ક

તપાસ એજન્સીઓનું કહેવું છે કે આરોપીઓએ વોટ્સએપ ઉપરાંત ટેલિગ્રામ અને સિગ્નલ જેવી એન્ક્રિપ્ટેડ એપ્સનો પણ ઉપયોગ કર્યો હતો. અનેક સ્થળોએ પ્રશ્નોના પ્રિન્ટઆઉટ કાઢીને ઓફલાઈન રીતે પણ વહેંચાણ કરાયું હોવાની આશંકા છે.

હાલ SOG અને CBI સોશિયલ મીડિયા ચેટ્સ, કોલ ડિટેઇલ રેકોર્ડ્સ (CDR) અને ડિજિટલ ફૂટપ્રિન્ટ્સના આધારે માસ્ટરમાઇન્ડ સુધી પહોંચવાનો પ્રયાસ કરી રહી છે.

ફરિયાદી જ શંકાના ઘેરામાં

સીકરના એક PG ઓપરેટરની ભૂમિકા હાલ સૌથી વધુ શંકાસ્પદ માનવામાં આવી રહી છે. ચોંકાવનારી વાત એ છે કે પરીક્ષા બાદ આ વ્યક્તિએ જ પોલીસ અને NTAમાં ફરિયાદ નોંધાવી હતી કે કેટલાક વિદ્યાર્થીઓ પાસે પહેલેથી જ પેપર હતું.

પરંતુ તપાસમાં સામે આવ્યું છે કે આ જ વ્યક્તિએ પરીક્ષા પહેલા આ સામગ્રી મેળવી હતી અને અન્ય લોકોને ફોરવર્ડ પણ કરી હતી. એજન્સીઓને શંકા છે કે પોતે બચવા માટે તેણે ‘વ્હિસલબ્લોઅર’ બનવાનું નાટક કર્યું હોઈ શકે છે.

22 લાખ વિદ્યાર્થીઓનું ભવિષ્ય અનિશ્ચિતતામાં

NEET પરીક્ષા રદ થતાં હવે દેશભરના લાખો વિદ્યાર્થીઓ ભારે માનસિક તણાવમાં મુકાયા છે. વર્ષો સુધીની મહેનત, લાખો રૂપિયાની કોચિંગ ફી અને સતત અભ્યાસ બાદ વિદ્યાર્થીઓ હવે ફરી પરીક્ષાની તૈયારી માટે મજબૂર બન્યા છે.

NTAએ સ્પષ્ટ કર્યું છે કે ફરીથી રજીસ્ટ્રેશન કરવાની જરૂર નહીં પડે, પરંતુ નવી પરીક્ષા તારીખ અને સમગ્ર પ્રક્રિયાને લઈને હજુ અનિશ્ચિતતા યથાવત છે.

વાલીઓ અને વિદ્યાર્થી સંગઠનો હવે સરકાર પાસે માંગ કરી રહ્યા છે કે ભવિષ્યમાં આવી ઘટના ફરી ન બને તે માટે પરીક્ષા પ્રણાલીને સંપૂર્ણ પારદર્શક અને સુરક્ષિત બનાવવામાં આવે અને સમગ્ર પેપર લીક માફિયાને કડકમાં કડક સજા કરવામાં આવે.