નવી દિલ્હી: Central Bureau of Investigation દ્વારા NEET UG 2026 પેપર લીક કેસમાં હવે તપાસનો વ્યાપ વધુ વિસ્તર્યો છે. તપાસ એજન્સીએ ધરપકડ કરાયેલા આરોપી પીવી કુલકર્ણી પાસેથી તેમના દ્વારા અગાઉ તૈયાર કરાયેલા તમામ પરીક્ષા પેપરો અંગે પૂછપરછ શરૂ કરી છે. સૂત્રો મુજબ તપાસ એજન્સીઓને શંકા છે કે કુલકર્ણીનો સંબંધ NEET 2024 પેપર લીક સહિતના અન્ય કેસો સાથે પણ હોઈ શકે છે.

‘લાતૂર પેટર્ન’ ચર્ચામાં

મહારાષ્ટ્રના લાતૂરથી બહાર આવેલું આ સમગ્ર નેટવર્ક હવે ‘લાતૂર પેટર્ન’ તરીકે ચર્ચાનું કેન્દ્ર બન્યું છે. CBIની તપાસ પહેલા સ્થાનિક પોલીસ દ્વારા પણ આ મોડ્યુલને લઈને અનેક મહત્વપૂર્ણ ખુલાસા કરવામાં આવ્યા હતા. હાલ CBIની ટીમ સતત લાતૂરમાં કેમ્પ કરીને તપાસ ચલાવી રહી છે.

તપાસ દરમિયાન જાણીતા RCC ઇન્સ્ટિટ્યૂટના સંચાલક શિવરાજ મોટેગાંવકર સહિત અનેક વિદ્યાર્થીઓ અને તેમના વાલીઓની પૂછપરછ કરવામાં આવી છે.

પીવી કુલકર્ણી અને મનીષા વાઘમારે માસ્ટરમાઈન્ડ

તપાસમાં સામે આવ્યું છે કે આ સમગ્ર રેકેટના મુખ્ય સુત્રધાર પીવી કુલકર્ણી અને મનીષા વાઘમારે હતા. બંનેએ મળીને મહારાષ્ટ્રના વિવિધ વિસ્તારોમાં વિદ્યાર્થીઓ સુધી પહોંચ બનાવી હતી.

આ ગેંગ કોચિંગ સંસ્થાઓના મૉક ટેસ્ટના પરિણામોના આધારે નબળા વિદ્યાર્થીઓને ઓળખી તેમની સાથે સંપર્ક સાધતો હતો. જૂના વિદ્યાર્થીઓને એજન્ટ તરીકે ઉપયોગમાં લેવામાં આવતા હતા, જેમાં મોટાભાગે એન્જિનિયરિંગ પૃષ્ઠભૂમિના વિદ્યાર્થીઓ સામેલ હોવાનું કહેવાય છે.

લાખો રૂપિયાની ઉઘરાણી

સૂત્રો અનુસાર અમીર પરિવારોના વિદ્યાર્થીઓ પાસેથી લાખો રૂપિયા વસૂલવામાં આવતા હતા, જ્યારે આર્થિક રીતે નબળા વિદ્યાર્થીઓનો ઉપયોગ માત્ર માધ્યમ તરીકે કરવામાં આવતો હતો. કેટલાક વિદ્યાર્થીઓએ લીક પેપર મેળવવા માટે ₹25 લાખ સુધી ચૂકવ્યા હતા, જ્યારે કેટલાકે ₹25 હજાર જમા કરાવ્યા હતા.

બેંક ટ્રાન્ઝેક્શન અને ડિજિટલ પુરાવાની તપાસ

પુણે પોલીસના એક વરિષ્ઠ અધિકારીએ જણાવ્યું કે NEET પરીક્ષાના દિવસે મનીષા વાઘમારેના ખાતામાં ₹10 લાખ ટ્રાન્સફર થયા હતા. ઉપરાંત અનેક વિદ્યાર્થીઓ દ્વારા ₹25-25 હજારની રકમ પણ તેના ખાતામાં જમા કરાવવામાં આવી હતી.

હાલ CBI દ્વારા જપ્ત કરાયેલા દસ્તાવેજો, ઇલેક્ટ્રોનિક ઉપકરણો અને બેંક ટ્રાન્ઝેક્શનની ફોરેન્સિક તપાસ ચાલી રહી છે. તપાસ એજન્સીઓને શંકા છે કે પીવી કુલકર્ણીએ પોતાની પહોંચ અને હોદ્દાનો દુરુપયોગ કરીને કેટલાક કોચિંગ સંસ્થાઓ સુધી લીક થયેલા પેપર પહોંચાડ્યા હતા.

વધુ મોટા ખુલાસાની શક્યતા

મેડિકલ એન્ટ્રન્સ પરીક્ષાની તૈયારી માટે જાણીતું લાતૂર શહેર વર્ષોથી ‘લાતૂર પેટર્ન’ માટે પ્રખ્યાત રહ્યું છે, પરંતુ હવે પેપર લીક કૌભાંડ બાદ તે જ મોડેલ તપાસ એજન્સીઓના નિશાને આવી ગયું છે. આવનારા દિવસોમાં આ કેસમાં વધુ મોટા ખુલાસા થવાની શક્યતા વ્યક્ત કરવામાં આવી રહી છે.