ગાંધીનગર: દેશની સૌથી મોટી જાહેર ક્ષેત્રની બેંક સ્ટેટ બેંક ઓફ ઇન્ડિયા (State Bank of India) ના કરોડો ગ્રાહકો માટે મહત્વપૂર્ણ માહિતી સામે આવી છે. આવતીકાલથી એટલે કે 23 મે થી 28 મે 2026 દરમિયાન બેંકિંગ કામગીરી પર મોટો અસરકારક સમયગાળો રહેવાની શક્યતા વ્યક્ત કરવામાં આવી છે, જેના કારણે ગ્રાહકોને અગાઉથી જરૂરી નાણાકીય કામ પૂર્ણ કરવા સલાહ આપવામાં આવી રહી છે.

6 દિવસ સુધી બેંકિંગ કામગીરી પર અસર કેમ પડી શકે?

આ સમયગાળા દરમિયાન અલગ-અલગ કારણોસર બેંક શાખાઓમાં કામકાજ પ્રભાવિત થઈ શકે છે:

23 મે (ચોથો શનિવાર): નિયમ મુજબ બેંકો બંધ રહેશે
24 મે (રવિવાર): સાપ્તાહિક રજા
25-26 મે (સોમવાર-મંગળવાર): બેંક કર્મચારી સંગઠન દ્વારા પ્રસ્તાવિત દેશવ્યાપી હડતાળ
27-28 મે: બકરી ઈદ (ઈદ-ઉલ-અઝહા)ના અવસરે જાહેર રજાઓ (રાજ્ય મુજબ અલગ વ્યવસ્થા શક્ય)

ગ્રાહકો પર શું અસર પડશે?

જો આ સ્થિતિ યથાવત રહે તો શાખા આધારિત બેંકિંગ સેવાઓ પર સીધી અસર જોવા મળી શકે છે. જેમાં નીચેની સેવાઓ ખોરવાઈ શકે છે:

ચેક ક્લિયરિંગ પ્રક્રિયા
રોકડ જમા અને ઉપાડ
પાસબુક અપડેટ અને નવી ઈશ્યુ પ્રક્રિયા
લોન અને દસ્તાવેજી કામકાજ

બેંક તરફથી ATM, YONO એપ અને નેટ બેંકિંગ જેવી ડિજિટલ સેવાઓ ચાલુ રાખવાની શક્યતા છે, પરંતુ રોકડ ઉપલબ્ધતામાં તંગી સર્જાઈ શકે છે.

હડતાળ પાછળનું કારણ શું છે?

ઓલ ઇન્ડિયા સ્ટેટ બેંક ઓફ ઇન્ડિયા સ્ટાફ ફેડરેશન (AISBISF) દ્વારા જણાવ્યા મુજબ, કર્મચારીઓની વિવિધ 16 પડતર માંગણીઓ લાંબા સમયથી બાકી છે. તેમાં મુખ્યત્વે કામના ભારણમાં ઘટાડો, કર્મચારી હિતોનું રક્ષણ અને સેવા ગુણવત્તા સુધારવા જેવી માંગણીઓનો સમાવેશ થાય છે.

ફેડરેશનનું કહેવું છે કે આ આંદોલનનો હેતુ કર્મચારીઓના અધિકારોની સુરક્ષા સાથે સાથે બેંકિંગ સિસ્ટમને વધુ કાર્યક્ષમ બનાવવાનો છે.