અમદાવાદ અમદાવાદમાં હવા પ્રદૂષણના સ્ત્રોતોને વધુ ચોકસાઈથી ઓળખવા માટે એક નવી અને આધુનિક પહેલ શરૂ કરવામાં આવી છે. અમદાવાદ મ્યુનિસિપલ કોર્પોરેશન (AMC) એ IIT કાનપુર સાથે મળીને “ATMAN – Advanced Technologies for Monitoring Air Quality Indicators” નામની મોબાઇલ પ્રયોગશાળા વેન લોન્ચ કરી છે.

આ ચાલતી-ફરતી લેબ શહેરના વિવિધ વિસ્તારોમાં ફરીને વાસ્તવિક સમય (real-time)માં હવામાં રહેલા પ્રદૂષકોનું માપન કરશે અને તેના સ્ત્રોતોની ચોક્કસ ઓળખ કરશે. ખાસ કરીને ધૂળ, વાહનોનો ધુમાડો અને ઉદ્યોગોમાંથી થતું ઉત્સર્જન કેટલું જવાબદાર છે તેની પણ વિગતવાર વિશ્લેષણ કરવામાં આવશે.

આ વેનમાં અદ્યતન સેન્સર અને મોનિટરિંગ ઉપકરણો લગાવવામાં આવ્યા છે, જે હવામાં રહેલા વિવિધ પ્રદૂષકોનું ડેટા એકત્ર કરી તેના પેટર્નનું મૂલ્યાંકન કરશે. આ માહિતીના આધારે શહેરમાં કયા વિસ્તારોમાં પ્રદૂષણ વધુ છે તેની પણ ચોક્કસ ઓળખ શક્ય બનશે.

અધિકારીઓના જણાવ્યા અનુસાર આ પહેલ ભારતના શહેરોમાં સ્વચ્છ, સ્માર્ટ અને ટકાઉ પર્યાવરણ બનાવવામાં વિજ્ઞાન અને ટેકનોલોજીના મહત્વપૂર્ણ ઉપયોગનું ઉદાહરણ છે.