અમદાવાદ: શહેરના નિકોલ વિસ્તારમાં ભક્તિ સર્કલ નજીક સોમવારે બપોરે હિટ એન્ડ રનની ગંભીર ઘટના સામે આવી છે. ઝડપી ગતિએ દોડતી બીએમડબલ્યુ કારએ પહેલા ઓટો રિક્ષાને જોરદાર ટક્કર મારી હતી, જેમાં રિક્ષા પલટી ખાઈ ગઈ અને ચાલકને ગંભીર ઈજાઓ પહોંચી હતી.

ટક્કર એટલી ભયાનક હતી કે કાર સીધી AMTS બસ સ્ટેન્ડમાં ઘુસી ગઈ હતી, જેના કારણે સ્ટેન્ડને ભારે નુકસાન થયું હતું. અકસ્માત બાદ કારચાલક વાહન સ્થળ પર જ છોડી ફરાર થઈ ગયો હતો.

ઘટનામાં ઈજાગ્રસ્ત રિક્ષાચાલકને માથા અને શરીરના ભાગે ગંભીર ઈજાઓ થતા તાત્કાલિક નજીકની હોસ્પિટલમાં ખસેડવામાં આવ્યો હતો. ઘટનાની જાણ થતાં I ડિવિઝન ટ્રાફિક પોલીસ સ્થળ પર પહોંચી તપાસ હાથ ધરી હતી.

પોલીસના જણાવ્યા મુજબ, અકસ્માત સર્જનાર કાર મહારાષ્ટ્રમાં નોંધાયેલ છે. એક ટીમ હોસ્પિટલમાં ઈજાગ્રસ્તનું નિવેદન લેવા મોકલાઈ છે, જ્યારે બીજી ટીમ ફરાર કારચાલકને શોધવા માટે કામગીરી કરી રહી છે. સમગ્ર મામલે વધુ તપાસ ચાલુ છે.