ગાંધીનગર ગાંધીનગરમાં ચોંકાવનારી ચોરીની ઘટનાનો ભંડાફોડ થયો છે, જેમાં પોલીસની જ ગાડીમાંથી વ્હીલ પ્લેટ ચોરી કરનાર આરોપીને ઇન્ફોસિટી પોલીસે ઝડપી પાડ્યો છે. પ્રાપ્ત માહિતી મુજબ, કુડાસણ વિસ્તારના શ્યામાપ્રસાદ મુખર્જી નગર વિસ્તારમાં આ ઘટના બની હતી.

આરોપી યુવકે પોલીસની ગાડીમાંથી કુલ ૮ વ્હીલ પ્લેટની ચોરી કરી હતી. ચોરીની આ સમગ્ર ઘટના નજીકના સીસીટીવી કેમેરામાં કેદ થઈ ગઈ હતી, જેના આધારે પોલીસે તપાસ શરૂ કરી હતી. ફૂટેજના આધારે આરોપીની ઓળખ કરી તેને ઝડપી પાડવામાં આવ્યો છે.

પોલીસ તપાસમાં એક વધુ ચોંકાવનારી વાત સામે આવી છે કે આરોપી યુવક અગાઉ પોલીસ વિભાગમાં કરાર આધારિત નોકરી કરતો હતો. જેના કારણે તેને પોલીસ વ્યવસ્થા અને ગાડીઓ અંગે પૂરતી જાણકારી હતી, અને એનો લાભ લઈ તેણે આ ચોરીને અંજામ આપ્યો હતો.

ઇન્ફોસિટી પોલીસે આરોપીની ધરપકડ સાથે ચોરીનો મુદ્દામાલ પણ કબજે કર્યો છે અને આગળની કાર્યવાહી હાથ ધરી છે. પોલીસે જણાવ્યું છે કે આ મામલે વધુ તપાસ ચાલી રહી છે અને આરોપી પાસેથી અન્ય કોઈ ગુનાહિત પ્રવૃત્તિઓ અંગે પણ માહિતી મેળવવામાં આવી રહી છે.

આ ઘટનાએ પોલીસ વિભાગમાં પણ ચિંતા ઊભી કરી છે અને સુરક્ષા વ્યવસ્થા વધુ મજબૂત બનાવવા તરફ ધ્યાન કેન્દ્રિત કરવામાં આવી રહ્યું છે.