સુરત: સુરત શહેરમાં ચોંકાવનારી ઘટના સામે આવી છે, જેમાં જિમમાં કસરત કરવા જતી એક મહિલાને પ્રેમજાળમાં ફસાવી બ્લેકમેઈલ કરનાર આરોપીને પોલીસે ઝડપી પાડ્યો છે. સુરતમાં બનેલી આ ઘટનાએ લોકોમાં ચિંતા ઉભી કરી છે. મળતી માહિતી મુજબ, આરોપી સબ્બીર અજગર અલી મહિલાને પ્રેમના જાળમાં ફસાવી નજીક આવ્યો હતો. મહિલાનો પરિવાર 100 કરોડથી વધુની સંપત્તિ ધરાવતો હોવાનું સામે આવ્યું છે. આરોપીએ આ સંબંધનો ગેરલાભ લઈ મહિલાના વ્યક્તિગત ફોટા મેળવી લીધા હતા અને બાદમાં તે ફોટા વાયરલ કરવાની ધમકી આપીને બ્લેકમેઈલ કરવાની શરૂ કરવામાં આવી હતી.

આરોપીએ મહિલાના પતિ પાસે ફોટા વાયરલ ન કરવા બદલ રૂપિયા 5 લાખની માંગણી કરી હતી. એટલું જ નહીં, તેણે મહિલાના પતિને જાનથી મારી નાખવાની ધમકી પણ આપી હતી. આ મામલે મહિલાના પતિએ પાલ પોલીસ મથકમાં ફરિયાદ નોંધાવતા પોલીસે તપાસ હાથ ધરી હતી.
પોલીસે ઝડપી કાર્યવાહી કરી આરોપી સબ્બીર અજગર અલીને ધરપકડ કરી છે. થોડા દિવસ પહેલા એસઓજીએ જિમ ટ્રેનરો સાથે બેઠક યોજી આવી ઘટનાઓથી સાવચેત રહેવા સૂચના આપી હતી. હાલ પોલીસે આરોપી સામે કાયદેસરની કાર્યવાહી શરૂ કરી વધુ તપાસ હાથ ધરી છે.