દિલ્હી-એનસીઆર વિસ્તારમાં કરવામાં આવેલા એક તાજેતરના અભ્યાસમાં સામે આવ્યું છે કે ડૉક્ટરની સલાહ લીધા બાદ પણ મોટા ભાગના દર્દીઓ પોતાની બીમારી અને સારવાર અંગે સંપૂર્ણ રીતે સંતોષ પામતા નથી. પરિણામે લગભગ 80 ટકા દર્દીઓ વધુ માહિતી મેળવવા માટે ગૂગલ અને સોશિયલ મીડિયા તરફ વળે છે.

'ઇન્ડિયા પેશન્ટ નેવિગેશન એન્ડ કન્ફ્યુઝન ઇન્ડેક્સ (IPNCI) 2026' નામના આ અભ્યાસમાં દિલ્હી, નોઇડા, ગુરુગ્રામ, ફરીદાબાદ અને ગાઝિયાબાદના 1,000 લોકોનો સમાવેશ કરવામાં આવ્યો હતો. અભ્યાસ મુજબ 78.5 ટકા દર્દીઓએ ડૉક્ટરની મુલાકાત બાદ પોતાની બીમારી, સારવાર અને આગામી પ્રક્રિયા વિશે વધુ માહિતી મેળવવા માટે ઇન્ટરનેટનો ઉપયોગ કર્યો હતો.

રિપોર્ટ અનુસાર 73.8 ટકા દર્દીઓએ જણાવ્યું કે ડૉક્ટર સાથેની મુલાકાત દરમિયાન તેમને પૂરતો સમય મળ્યો નહોતો. જ્યારે 70 ટકા લોકોએ કહ્યું કે તેમને જરૂરી ટેસ્ટ, ડાયગ્નોસ્ટિક પ્રક્રિયા અથવા નિષ્ણાત ડૉક્ટર સુધી પહોંચવા અંગે સ્પષ્ટ માર્ગદર્શન મળ્યું નહોતું.

અભ્યાસમાં વધુમાં જાણવા મળ્યું કે 72 ટકા દર્દીઓને હેલ્પડેસ્ક, પેશન્ટ કોઓર્ડિનેટર, હેલ્પલાઇન અથવા ડિજિટલ સહાય જેવી સેવાઓનો ઉપયોગ કેવી રીતે કરવો તેની પૂરતી જાણકારી નહોતી. જેના કારણે દર્દીઓમાં ગૂંચવણ અને અનિશ્ચિતતા વધતી હોવાનું સામે આવ્યું છે.

રિપોર્ટ મુજબ 35.8 ટકા દર્દીઓ સેકન્ડરી હેલ્થકેર સુવિધાઓને અવગણીને સીધા જ મોટા ખાનગી હોસ્પિટલોમાં સારવાર માટે પહોંચે છે. જેના કારણે એડવાન્સ્ડ કેર સેન્ટરો પર દર્દીઓનો ભાર વધે છે અને સારવારનો ખર્ચ પણ વધુ થાય છે.

અભ્યાસ સાથે જોડાયેલા નિષ્ણાતોનું માનવું છે કે દેશમાં આરોગ્ય સેવાઓ અંગે યોગ્ય માર્ગદર્શન અને દર્દી સહાય વ્યવસ્થાને વધુ મજબૂત બનાવવાની જરૂર છે. તેમના જણાવ્યા અનુસાર, માત્ર આરોગ્ય સેવાઓ ઉપલબ્ધ કરાવવી પૂરતી નથી, પરંતુ દર્દીઓને તે સેવાઓને યોગ્ય રીતે સમજવામાં મદદ કરવી પણ એટલી જ જરૂરી છે.

નિષ્ણાતોના મતે, જો દર્દીઓને ડૉક્ટર તરફથી સ્પષ્ટ માહિતી, યોગ્ય કાઉન્સેલિંગ અને હેલ્થકેર નેવિગેશનની સુવિધા મળે તો ઇન્ટરનેટ પર અધૂરી અથવા ભ્રામક માહિતી શોધવાની જરૂરિયાતમાં નોંધપાત્ર ઘટાડો થઈ શકે છે.