અમદાવાદ અમદાવાદમાં મુંબઈ-અમદાવાદ બુલેટ ટ્રેન પ્રોજેક્ટ હેઠળ સાબરમતી નદી પર 36 મીટર ઊંચા (લગભગ 12 માળ જેટલા) બ્રિજનું નિર્માણ ઝડપથી આગળ વધી રહ્યું છે. નેશનલ હાઈ સ્પીડ રેલ કોર્પોરેશન (NHSRCL) દ્વારા આપવામાં આવેલી માહિતી મુજબ, આ બ્રિજની લંબાઈ 480 મીટર છે અને તે વેસ્ટર્ન રેલ્વેની અમદાવાદ-દિલ્હી મુખ્ય લાઈનની બાજુમાં બનાવાઈ રહ્યો છે.

આ બ્રિજ સાબરમતી અને અમદાવાદ બુલેટ ટ્રેન સ્ટેશન વચ્ચે વ્યૂહાત્મક રીતે સ્થિત છે, જે સાબરમતી બુલેટ ટ્રેન સ્ટેશનથી અંદાજે 1 કિમી અને અમદાવાદ બુલેટ ટ્રેન સ્ટેશનથી લગભગ 4 કિમી દૂર આવેલો છે. બ્રિજના કુલ 8 સર્ક્યુલર પિયર્સનું કામ પૂર્ણ થઈ ચૂક્યું છે, જેમાંથી 4 નદીના પટમાં, 2 કિનારે અને 2 નદીની બહાર બનાવવામાં આવ્યા છે. પિયર્સની ઊંચાઈ 31 થી 34 મીટર વચ્ચે છે.

બ્રિજમાં 76 મીટરના 5 સ્પાન અને 50 મીટરના 2 સ્પાનનો સમાવેશ થાય છે. આનું નિર્માણ “બેલેન્સ્ડ કેન્ટીલિવર” પદ્ધતિથી કરવામાં આવી રહ્યું છે, જે ઊંડા પાણી અને લાંબા સ્પાન માટે યોગ્ય ગણાય છે. આ ટેક્નિક દ્વારા નીચે સ્કેફોલ્ડિંગ વગર ઉપરથી સેગમેન્ટ જોડીને મજબૂત સ્ટ્રક્ચર તૈયાર કરવામાં આવે છે.

હાલમાં બ્રિજના તમામ ફાઉન્ડેશન અને સબસ્ટ્રક્ચરનું કામ પૂર્ણ થઈ ગયું છે. 76 મીટરના 3 સ્પાન પૂર્ણ થયા છે અને હવે સુપરસ્ટ્રક્ચરનું કામ, જેમ કે પિયર હેડ અને સેગમેન્ટ કાસ્ટિંગ, ચાલુ છે. નિર્માણ દરમિયાન નદીના પાણીના પ્રવાહને અસર ન થાય તે માટે ખાસ વ્યવસ્થા કરવામાં આવી છે, જેમાં હ્યુમ પાઈપ અને નેચરલ ચેનલ જાળવી રાખવામાં આવી છે.