સુરત: ગુજરાતમાં સ્થાનિક સ્વરાજની ચૂંટણીને લઈને ભાજપ, કોંગ્રેસ અને આપ વચ્ચે જોરદાર રાજકીય જંગ જામ્યો છે. ચૂંટણીનો આ ઉત્સાહ હવે સુરતના બજારમાં પણ સ્પષ્ટપણે જોવા મળી રહ્યો છે. પ્રચાર માટેની વિવિધ સામગ્રીઓની માંગ વધતા બજારમાં ખાસ ચહલપહલ જોવા મળી રહી છે.

સુરતના બજારોમાં તમામ રાજકીય પક્ષોના બેનર, પોસ્ટર, ટોપી, ઝંડા, કટઆઉટ, ખેસ અને મફલર જેવી વસ્તુઓની મોટી સંખ્યામાં વેચાણ થઈ રહ્યું છે. સાથે સાથે 3D ઈફેક્ટ અને ડિજિટલ પ્રિન્ટિંગ માટે પણ ખાસ માંગ ઊભી થઈ છે, જે વેપારીઓ માટે નવો અવસર બની રહ્યો છે.

ખાસ કરીને નરેન્દ્ર મોદીના ચહેરાવાળા માસ્કની ભારે માંગ જોવા મળી રહી છે. યુવાનોમાં આ માસ્ક ખૂબ લોકપ્રિય બન્યા છે અને તેના સોથી વધુ ઓર્ડર મળી રહ્યા છે. ઉપરાંત, ડિઝાઈનર મફલર પણ યુવાનોને આકર્ષવા માટે હિટ પ્રોડક્ટ બની રહ્યા છે. ચૂંટણી પ્રચારને વધુ અસરકારક બનાવવા માટે રાજકીય પક્ષો પેન, ડાયરી અને સ્ટીકર જેવી વસ્તુઓનો પણ વ્યાપક ઉપયોગ કરી રહ્યા છે, જેથી મતદારો સુધી સીધી પહોંચ બનાવી શકાય.

છેલ્લા બે વર્ષથી બજારમાં મંદીનો માહોલ હતો, પરંતુ સ્થાનિક સ્વરાજની ચૂંટણીને કારણે હવે વેપારમાં ફરી તેજી આવી છે. વેપારીઓમાં ખુશીનો માહોલ છે, જ્યારે લોકો પણ ઉત્સાહપૂર્વક વિવિધ પ્રચાર સામગ્રી ખરીદી રહ્યા છે.