Facebook Instagram Down: દુનિયાભરના કરોડો Meta યુઝર્સને શુક્રવારે અચાનક મુશ્કેલીનો સામનો કરવો પડ્યો, જ્યારે ફેસબુક અને ઇન્સ્ટાગ્રામ સહિત Metaના કેટલાક લોકપ્રિય સોશિયલ મીડિયા પ્લેટફોર્મ્સ અચાનક ડાઉન થઈ ગયા હતા. લગભગ 20 મિનિટ સુધી ચાલેલી આ ટેકનિકલ ખામીને કારણે લાખો લોકો તેમના એકાઉન્ટનો સામાન્ય રીતે ઉપયોગ કરી શક્યા નહોતા. યુઝર્સે સોશિયલ મીડિયા પર ફરિયાદ કરી હતી કે ફેસબુક અને ઇન્સ્ટાગ્રામ પર ફીડ રિફ્રેશ થતી નહોતી, નવા પોસ્ટ અપલોડ કરવામાં મુશ્કેલી પડી રહી હતી અને કેટલાક લોકોને લોગિન કરવામાં પણ સમસ્યાનો સામનો કરવો પડ્યો હતો.

ભારત સહિત અનેક દેશોમાં એક જ સમયે આ સમસ્યા નોંધાતા યુઝર્સે અન્ય સોશિયલ મીડિયા પ્લેટફોર્મ્સ પર જઈને આઉટેજ અંગે માહિતી શેર કરવાનું શરૂ કર્યું હતું. Downdetector જેવી આઉટેજ ટ્રેકિંગ વેબસાઇટ પર પણ ફરિયાદોની સંખ્યા ઝડપથી વધી ગઈ હતી. ઘણા યુઝર્સે જણાવ્યું હતું કે વેબસાઇટ્સ ખુલી રહી હતી, પરંતુ મોબાઇલ એપ્લિકેશન્સમાં નવા કન્ટેન્ટ લોડ થવામાં અને ટાઈમલાઈન અપડેટ કરવામાં મુશ્કેલી આવી રહી હતી. કેટલાક યુઝર્સે ફેસબુક મેસેન્જરમાં પણ સમાન પ્રકારની સમસ્યાઓ અનુભવવાની ફરિયાદ કરી હતી.

જોકે, આશરે 20 મિનિટ બાદ સેવાઓ ફરી સામાન્ય થવા લાગી હતી, તેમ છતાં કેટલાક ફીચર્સને લઈને હજુ પણ છૂટક ફરિયાદો સામે આવી રહી છે. Meta તરફથી આ આઉટેજનું ચોક્કસ કારણ જાહેર કરવામાં આવ્યું નથી. આ ઘટનાએ ફરી એકવાર દુનિયાભરના કરોડો લોકોના દૈનિક જીવનમાં સોશિયલ મીડિયા પ્લેટફોર્મ્સની મહત્વપૂર્ણ ભૂમિકા અને ટેકનિકલ ખામી સર્જાય ત્યારે પડતી અસરને ઉજાગર કરી છે.