સુરત સુરતમાં વડાપ્રધાન નરેન્દ્ર મોદીના આગમનને લઈને શહેરના અઠવાલાઈન્સ સ્થિત ઇન્ડોર સ્ટેડિયમ ખાતે તમામ તૈયારીઓને આખરી ઓપ આપી દેવામાં આવ્યો છે. આ વખતે કાર્યક્રમની સૌથી વિશેષ અને અનોખી બાબત એ છે કે સમગ્ર કાર્યક્રમને સંપૂર્ણપણે ઈકો-ફ્રેન્ડલી બનાવવામાં આવ્યો છે. પર્યાવરણ સંરક્ષણનો સંદેશ આપતી આ પહેલ હાલ શહેરમાં ચર્ચાનો વિષય બની છે.

અઠવાલાઈન્સ વિસ્તારમાં આવેલા ઇન્ડોર સ્ટેડિયમ ખાતે યોજાનારા વડાપ્રધાન નરેન્દ્ર મોદીના ભવ્ય કાર્યક્રમ માટે વહીવટી તંત્ર અને સુરત મ્યુનિસિપલ કોર્પોરેશન દ્વારા તમામ તૈયારીઓ પૂર્ણ કરવામાં આવી છે. વડાપ્રધાનના સ્વાગતથી લઈને સુરક્ષા વ્યવસ્થા સુધીની દરેક કામગીરીને અંતિમ રૂપ આપવામાં આવ્યું છે.

આ કાર્યક્રમની સૌથી મોટી વિશેષતા એ છે કે તેને પર્યાવરણને અનુકૂળ બનાવવાના ઉદ્દેશ સાથે સંપૂર્ણપણે ઈકો-ફ્રેન્ડલી સ્વરૂપ આપવામાં આવ્યું છે. ગ્લોબલ વોર્મિંગ અને વધતા પ્લાસ્ટિક પ્રદૂષણ સામે જનજાગૃતિ ફેલાવવા માટે સુરત મ્યુનિસિપલ કોર્પોરેશન અને વહીવટી તંત્રે એક અનોખી પહેલ હાથ ધરી છે.

કાર્યક્રમમાં ઉપસ્થિત રહેતા વીઆઈપી મહેમાનો, સરકારી અધિકારીઓ તેમજ નાગરિકો માટે પ્લાસ્ટિકની બોટલો અને ડિસ્પોઝેબલ ગ્લાસના ઉપયોગને ટાળવામાં આવ્યો છે. તેના બદલે પરંપરાગત માટીના માટલા અને કુલ્હડમાં પીવાના પાણીની વ્યવસ્થા કરવામાં આવી છે. કાર્યક્રમમાં આવનાર તમામ મહેમાનોને માટીના પાત્રોમાંથી જ પાણી પીરસવામાં આવશે.

આ પહેલ દ્વારા આધુનિક ભારતના ડિજિટલ વિકાસ અને દેશની પ્રાચીન પરંપરાઓ વચ્ચેનો સુંદર સમન્વય જોવા મળી રહ્યો છે. વડાપ્રધાન મોદીના પર્યાવરણ સંરક્ષણ અને ‘લાઈફસ્ટાઈલ ફોર એન્વાયરમેન્ટ (LiFE)’ના સંદેશને પણ આ આયોજન વધુ મજબૂત બનાવે છે.

પર્યાવરણ પ્રત્યેની જવાબદારી અને સ્વદેશી પરંપરાના સંવર્ધનનો સંદેશ આપતી આ પહેલ હાલ સુરતમાં "ટોક ઓફ ધ ટાઉન" બની છે અને લોકોમાં પણ તેની પ્રશંસા થઈ રહી છે.