Russia Ukraine War: કેન્દ્ર સરકારે શુક્રવારે સુપ્રીમ કોર્ટને જાણ કરી કે, રશિયા-યુક્રેન યુદ્ધમાં રશિયન સેના તરફથી લડતા 10 ભારતીયો મૃત્યુ પામ્યા છે. મુખ્ય ન્યાયાધીશ સૂર્યકાંત, ન્યાયાધીશ જોયમલ્યા બાગચી અને ન્યાયાધીશ વિપુલ એમ પંચોલીની બનેલી બેન્ચે કહ્યું કે, પરિસ્થિતિને સાવધાનીપૂર્વક અને કાર્યક્ષમ રીતે સંભાળવાની જરૂર છે. કારણ કે, યુદ્ધ ક્ષેત્રમાંથી મૃતદેહો પાછા લાવવા અત્યંત મુશ્કેલ હોઈ શકે છે. કેન્દ્ર તરફથી હાજર રહેલા એડિશનલ સોલિસિટર જનરલ (ASG) ઐશ્વર્યા ભાટીએ બેન્ચને 10 ભારતીયોના મૃત્યુ વિશે માહિતી આપી હતી. 

રશિયામાં અટકાયતમાં લેવામાં આવેલા અને યુદ્ધમાં લડવા માટે મજબૂર કરાયેલા 26 ભારતીયોને સુરક્ષિત પરત લાવવા માટે સરકારને નિર્દેશ આપવાની માગ કરતી અરજીની સુનાવણી દરમિયાન ભાટીએ આ માહિતી આપી હતી. અરજદારોનો આરોપ છે કે, તેમના સંબંધીઓને આકર્ષક નોકરીઓના બહાને રશિયા લાવવામાં આવ્યા હતા, જ્યાં તેમના પાસપોર્ટ જપ્ત કરવામાં આવ્યા હતા અને તેમને યુદ્ધમાં જોડાવા માટે દબાણ કરવામાં આવ્યું હતું. ASGએ પુષ્ટિ આપી હતી કે, અરજીમાં નામ આપવામાં આવેલા 26 લોકોમાંથી 10 લોકો મૃત્યુ પામ્યા છે, એક ગુનાહિત આરોપોમાં જેલમાં છે અને એકે સ્વેચ્છાએ રશિયામાં રહેવાનો નિર્ણય લીધો છે. 

કેન્દ્રએ જણાવ્યું હતું કે, કેટલાક લોકોને છેતરપિંડી કરનારા એજન્ટો દ્વારા ગેરમાર્ગે દોરવામાં આવ્યા હતા, જ્યારે અન્ય લોકોએ રશિયન સંસ્થાઓ સાથે સ્વૈચ્છિક કરાર કર્યા હતા. ASGએ એમ પણ કહ્યું હતું કે, વિદેશ મંત્રાલયને મૃતદેહોને સ્વદેશ મોકલવામાં કેટલાક પરિવારો તરફથી લોજિસ્ટિકલ અવરોધો અને અસહકારનો સામનો કરવો પડ્યો હતો. સરકાર મુશ્કેલીમાં મુકાયેલા દરેક નાગરિકને મદદ કરવા માટે પ્રતિબદ્ધ છે, તેમણે કહ્યું. ભાટીએ કહ્યું કે, "એક કિસ્સામાં અમે મૃતદેહને સ્વદેશ મોકલવાની વ્યવસ્થા કરી હતી, પરંતુ પરિવારે મંત્રાલયને તેને ત્રણ મહિના માટે મુલતવી રાખવા કહ્યું છે. કારણ કે, તેઓ કાનૂની કાર્યવાહી કરી રહ્યા હતા. તેમાં ઘણા જટિલ માનવીય પાસાઓ સામેલ છે." 

અરજદારોના વકીલે સરકારના સ્વૈચ્છિક સેવાના દાવાને ફગાવી દીધો, તેને માનવ તસ્કરીનો સ્પષ્ટ કેસ ગણાવ્યો. તેમણે કહ્યું કે, પીડિતોને એજન્ટો દ્વારા રશિયા મોકલવા માટે છેતરવામાં આવ્યા હતા અને તેમના મુસાફરી દસ્તાવેજો જપ્ત કર્યા પછી તેમને મોરચા પર લડવાની ફરજ પાડવામાં આવી હતી. વકીલે કહ્યું કે, વિદેશ મંત્રાલય સહકાર આપી રહ્યું નથી.