રાઘવ ચઢ્ઢાએ PM મોદીને ભગવાન ગણેશની મૂર્તિ ભેટ આપી, કહ્યું- ‘આ સવાર હંમેશા યાદ રહેશે’

ભાજપના રાજ્યસભા સાંસદ રાઘવ ચઢ્ઢાએ વડાપ્રધાન નરેન્દ્ર મોદી સાથેની મુલાકાતને યાદગાર ગણાવી છે. રાઘવ ચઢ્ઢાએ વડાપ્રધાન મોદી સાથેની મુલાકાતની તસવીર સોશિયલ મીડિયા પ્લેટફોર્મ ‘X’ પર શેર કરી હતી. તસવીરમાં તેઓ વડાપ્રધાન મોદીને ભગવાન ગણેશની મૂર્તિ ભેટ આપતા જોવા મળે છે.

રાઘવ ચઢ્ઢાએ પોતાની પોસ્ટમાં લખ્યું કે, “એક સવાર જે હંમેશા યાદ રહેશે. વડાપ્રધાન મોદી સાથે મળવાનું સૌભાગ્ય મળ્યું. તેમની સાથે વિસ્તૃત અને સમૃદ્ધ ચર્ચા થઈ. તેમના કિંમતી સમય અને માર્ગદર્શનથી શીખવાની તક આપવા બદલ હૃદયપૂર્વક આભારી છું.”

મુલાકાત દરમિયાન રાઘવ ચઢ્ઢાએ વડાપ્રધાનને ભગવાન ગણેશની મૂર્તિ અર્પણ કરી હતી. બંને નેતાઓ વચ્ચે વિવિધ મુદ્દાઓ પર ચર્ચા થઈ હોવાની માહિતી સામે આવી છે.

આ મુલાકાતના થોડા દિવસો પહેલાં, 6 ઓગસ્ટે રાઘવ ચઢ્ઢાએ રાજ્યસભામાં ડૉક્ટરો અને ડાયગ્નોસ્ટિક સેન્ટરો વચ્ચે ચાલતા કથિત ‘કટ મની’ અથવા રેફરલ કમિશનના મુદ્દે ગંભીર ચિંતા વ્યક્ત કરી હતી. શૂન્યકાળ દરમિયાન તેમણે આ મુદ્દો ઉઠાવતા કહ્યું હતું કે કેટલીક જગ્યાએ દર્દીઓને તપાસ માટે રેફર કરવાના બદલામાં ડૉક્ટરોને કમિશન ચૂકવવામાં આવે છે.

ચઢ્ઢાએ દાવો કર્યો હતો કે કેટલાક કિસ્સાઓમાં દર્દીને રેફર કરવા માટે ડૉક્ટરને રૂ. 3,000 સુધીનું કમિશન આપવામાં આવે છે. તેમણે એવો પણ આક્ષેપ કર્યો હતો કે આ ખર્ચ અંતે દર્દીના બિલમાં ઉમેરાઈ જાય છે. તેમણે આ પ્રકારની વ્યવસ્થા સામે યોગ્ય પગલાં લેવાની જરૂરિયાત પર ભાર મૂક્યો હતો.