અદાણી ઇન્ટરનેશનલ સ્કૂલ દ્વારા ISSO નેશનલ ગેમ્સ ચેસ ચેમ્પિયનશિપ 2026નું આયોજન

ISSO National Games Chess Championship 2026: અમદાવાદમાં અદાણી ઈન્ટરનેશનલ સ્કૂલ દ્વારા ISSO નેશનલ ગેમ્સ ચેસ ચેમ્પિયનશિપ 2026નું આયોજન કરવામાં આવી રહ્યું છે. બે દિવસીય આ રાષ્ટ્રીય કક્ષાની ચેસ સ્પર્ધામાં દેશના 10થી વધુ રાજ્યોની 100થી વધુ શાળાઓના 425થી વધુ યુવા ચેસ ખેલાડીઓ ભાગ લઈ રહ્યા છે. સમગ્ર કાર્યક્રમમાં 800થી વધુ વિદ્યાર્થીઓ, વાલીઓ, કોચ અને શાળાના પ્રતિનિધિઓ જોડાયા છે.

ISSO નેશનલ ગેમ્સની આ ચેસ ચેમ્પિયનશિપમાં અંડર-11, અંડર-14, અંડર-17 અને અંડર-19 એમ ચાર વયજૂથ રાખવામાં આવ્યા છે. વિવિધ રાજ્યો અને શાળાઓના ખેલાડીઓને રાષ્ટ્રીય સ્તરે એકબીજા સામે રમવાની તક મળી રહી છે. સ્પર્ધામાં ખેલાડીઓની એકાગ્રતા, નિર્ણય લેવાની ક્ષમતા, તૈયારી અને દબાણ વચ્ચે શાંત રહીને યોગ્ય ચાલ કરવાની કસોટી થઈ રહી છે.

ગ્રાન્ડમાસ્ટર પ્રજ્ઞાનંદની હાજરીમાં ઉદ્ઘાટન

ચેમ્પિયનશિપનું ઉદ્ઘાટન ભારતીય ચેસ ગ્રાન્ડમાસ્ટર રમેશબાબુ પ્રજ્ઞાનંદ અને ISSOની એડવાઇઝરી બોર્ડ સભ્ય તથા અદાણી ઈન્ટરનેશનલ સ્કૂલની પ્રમોટર નમ્રતા અડાણીની હાજરીમાં કરવામાં આવ્યું હતું. ગુજરાતના નાયબ મુખ્યમંત્રી હર્ષ સંઘવી પણ કાર્યક્રમમાં ઉપસ્થિત રહ્યા હતા. તેમણે સ્પર્ધામાં ભાગ લેનારા વિદ્યાર્થીઓ સાથે સંવાદ કર્યો હતો. તેમની હાજરીથી રાષ્ટ્રીય કક્ષાની આ સ્કૂલ ચેસ સ્પર્ધાના ઉદ્ઘાટન પ્રસંગે ઉત્સાહમાં વધારો થયો હતો.

નમ્રતા અડાણીએ રમતના મહત્વ પર ભાર મૂક્યો

નમ્રતા અડાણીએ જણાવ્યું હતું કે ચેસ બાળકોને આગળ વિચારીને નિર્ણય લેવાનું અને પરિણામ અનિશ્ચિત હોય ત્યારે પણ શાંત રહેવાનું શીખવે છે. તેમના જણાવ્યા મુજબ ચેસમાંથી મળતા આ ગુણો રમતની બહારના જીવનમાં પણ ઉપયોગી બને છે. તેમણે કહ્યું કે આવી સ્પર્ધાઓ વિદ્યાર્થીઓને શિસ્તબદ્ધ રીતે તૈયારી કરવા, આત્મવિશ્વાસ સાથે સ્પર્ધા કરવા અને જીત-હાર બંનેમાંથી શીખવાની તક આપે છે.

દેશભરના વિદ્યાર્થીઓને એક પ્લેટફોર્મ

ISSO નેશનલ ગેમ્સની આ ચેસ ચેમ્પિયનશિપમાં અલગ-અલગ રાજ્યો અને શાળાઓના વિદ્યાર્થીઓ એક જ મંચ પર આવ્યા છે. ચેસ પ્રત્યેના પોતાના જુસ્સા સાથે વિદ્યાર્થીઓ સ્પર્ધા કરવાની સાથે એકબીજા પાસેથી શીખી રહ્યા છે અને નવા સંબંધો પણ બનાવી રહ્યા છે. રાષ્ટ્રીય સ્તરની આ સ્પર્ધા વિદ્યાર્થીઓને માત્ર પરિણામ મેળવવા પૂરતી મર્યાદિત નથી, પરંતુ સ્પર્ધાત્મક વાતાવરણ, રમતગમતની ભાવના અને રાષ્ટ્રીય સ્તરે રમવાનો અનુભવ પણ આપી રહી છે.

શિક્ષણમાં રમતગમતને પ્રોત્સાહન

અદાણી ઈન્ટરનેશનલ સ્કૂલ માટે આ ચેમ્પિયનશિપની યજમાની શિક્ષણમાં રમતગમતની ભૂમિકાને વધુ મજબૂત બનાવવાના પ્રયાસનો ભાગ છે. શાળા વિદ્યાર્થીઓને સ્પર્ધાત્મક તકો આપવાની સાથે શિસ્ત, આત્મવિશ્વાસ, નેતૃત્વ, રમતગમતની ભાવના અને પડકારોનો સામનો કરવાની ક્ષમતા જેવા ગુણો વિકસાવવા પર ભાર મૂકે છે. હાલ સ્પર્ધા શરૂ થઈ ગઈ છે અને ખેલાડીઓ વિવિધ રાઉન્ડમાં આગળ વધી રહ્યા છે. દરેક મુકાબલામાં ખેલાડીઓની તૈયારી, યોગ્ય નિર્ણય લેવાની ક્ષમતા અને સંયમની કસોટી થઈ રહી છે.