Nepal Snowfall: નેપાળમાં ભારે હિમવર્ષા વચ્ચે ફસાયેલા 6 ભારતીય પ્રવાસીઓનું રેસ્ક્યૂ, હેલિકોપ્ટરથી સુરક્ષિત બહાર કઢાયા

Nepal Snowfall: નેપાળના અપર ડોલ્પો વિસ્તારમાં ભારે હિમવર્ષા અને ખરાબ હવામાનને કારણે ફસાયેલા 6 ભારતીય પ્રવાસીઓને સોમવારે સવારે સુરક્ષિત રીતે બહાર કાઢવામાં આવ્યા હતા. આ પ્રવાસીઓમાં 2 મહિલાઓ અને 4 પુરુષોનો સમાવેશ થાય છે. તમામને હેલિકોપ્ટરની મદદથી રેસ્ક્યૂ કરવામાં આવ્યા હતા. જિલ્લા વહીવટીતંત્રના જણાવ્યા મુજબ તમામ 6 પ્રવાસીઓની તબિયત સામાન્ય છે.

સવારે 6:30 વાગ્યે શરૂ થયું રેસ્ક્યૂ ઓપરેશન

મળતી માહિતી મુજબ, સોમવારે સવારે લગભગ 6:30 વાગ્યે પ્રવાસીઓને બચાવવા માટે હેલિકોપ્ટરે ઉડાન ભરી હતી. સૌપ્રથમ હેલિકોપ્ટર ઘટનાસ્થળે પહોંચ્યું અને ત્યાં ફસાયેલી બંને મહિલાઓને સુરક્ષિત બહાર કાઢીને ડોલ્પા જિલ્લાના મુખ્ય મથક દુનાઈ પહોંચાડવામાં આવી હતી.

ત્યારબાદ હેલિકોપ્ટર ફરી ઘટનાસ્થળે પહોંચ્યું અને બાકી રહેલા ચાર પુરુષ પ્રવાસીઓને પણ સુરક્ષિત રીતે બહાર કાઢ્યા હતા. ડોલ્પાનાં મુખ્ય જિલ્લા અધિકારી જુનુ હમાલ ઢકાલે તમામ 6 ભારતીય પ્રવાસીઓના સુરક્ષિત રેસ્ક્યૂની પુષ્ટિ કરી હતી.

1 નવેમ્બરથી તૂટી ગયો હતો સંપર્ક

જિલ્લા વહીવટીતંત્રના જણાવ્યા અનુસાર, 1 નવેમ્બરના રોજ પહેલીવાર આ પ્રવાસીઓ ભારે હિમવર્ષાને કારણે ફસાયા હોવાની જાણકારી મળી હતી. ત્યારથી તેમને સુરક્ષિત બહાર કાઢવાના પ્રયાસો શરૂ કરવામાં આવ્યા હતા. પરંતુ અપર ડોલ્પોના દુર્ગમ પહાડી વિસ્તારમાં સતત ખરાબ હવામાન અને ભારે હિમવર્ષાને કારણે રેસ્ક્યૂ ઓપરેશનમાં મુશ્કેલીઓ આવી હતી. પ્રતિકૂળ હવામાનને કારણે હેલિકોપ્ટર ઉડાન ભરી શકતું ન હતું. આ ઉપરાંત રેસ્ક્યૂ માટે હેલિકોપ્ટરની વ્યવસ્થા કરવામાં પણ મુશ્કેલી પડી હતી, જેના કારણે બચાવ અભિયાનમાં વિલંબ થયો હતો.

જરૂરી પરવાનગી વિના પ્રવાસે ગયા હતા

જિલ્લા વહીવટીતંત્રના જણાવ્યા અનુસાર, ભારતીય પ્રવાસીઓએ અપર ડોલ્પોની મુસાફરી માટે જરૂરી વહીવટી પરવાનગી લીધી ન હતી. તેઓ ડોલ્પો બુદ્ધ ધોથી શે-ફોક્સુન્ડો વિસ્તારમાં આવેલી પ્રસિદ્ધ ફોક્સુન્ડો સરોવર તરફથી પરત ફરી રહ્યા હતા. આ દરમિયાન નુમલા અને વાગલા પહાડી ઘાટ નજીક ભારે હિમવર્ષામાં ફસાઈ ગયા હતા.

આ બંને ઘાટ ઊંચાઈવાળા અને દુર્ગમ વિસ્તારમાં આવેલા છે. ખરાબ હવામાન દરમિયાન અહીં અવરજવર કરવી ખૂબ મુશ્કેલ બની જાય છે. વહીવટીતંત્ર અને સ્થાનિક લોકોએ અગાઉથી જ ખરાબ હવામાન તથા ભારે હિમવર્ષાના જોખમને ધ્યાનમાં રાખીને પ્રવાસીઓને પહાડી વિસ્તારમાં મુસાફરી ન કરવાની સલાહ આપી હતી. પરંતુ જરૂરી પરવાનગી વિના આ જોખમી માર્ગ પર પ્રવાસ કરવાને કારણે તેમને મુશ્કેલીઓનો સામનો કરવો પડ્યો હતો. હાલ તમામ 6 ભારતીય પ્રવાસીઓને સુરક્ષિત બહાર કાઢવામાં આવ્યા છે અને તેમની તબિયત સામાન્ય હોવાનું વહીવટીતંત્રે જણાવ્યું છે.

આ પણ વાંચો: Quad Meeting 2026: ક્વાડની બેઠકમાં ભારતની પ્રશંસા, હોર્મુઝ અને લાલ સાગર અંગે મોટું નિવેદન