Russia Su-30SM Crash: રશિયામાં Su-30SM ફાઈટર જેટ ક્રેશ, બંને પાયલટનો જીવ માંડ માંડ બચ્યો

Russia Su-30SM Crash: રશિયાના કલિનિનગ્રાદ વિસ્તારમાં ચેર્યાખોવ્સ્ક જિલ્લામાં ટ્રેનિંગ ફ્લાઈટ દરમિયાન Su-30SM ફાઈટર જેટ ક્રેશ થયું છે. તિમોફેયેવકા અને ઝેલ્યોનોઈ બોર ગામ વચ્ચે વિમાન તૂટી પડ્યું હતું. જોકે, વિમાનમાં સવાર બંને પાયલટે સમયસર ઈજેક્ટ કરીને પોતાનો જીવ બચાવી લીધો હતો. બંને પાયલટને ઈજાગ્રસ્ત હાલતમાં સૈન્ય હોસ્પિટલમાં ખસેડવામાં આવ્યા છે. રશિયન સંરક્ષણ મંત્રાલયે જણાવ્યું છે કે બંનેની હાલત સ્થિર છે અને તેમના જીવને કોઈ જોખમ નથી.

દુર્ઘટના સમયે વિમાનમાં કોઈ યુદ્ધ સામગ્રી નહોતી

રશિયન સંરક્ષણ મંત્રાલયના જણાવ્યા અનુસાર, દુર્ઘટના સમયે વિમાનમાં કોઈ યુદ્ધ સામગ્રી નહોતી. વિમાન નિર્જન વિસ્તારમાં પડ્યું હોવાથી મોટી જાનહાનિ ટળી હતી. ઘટનાની તપાસ માટે સૈન્ય અધિકારીઓ દ્વારા કમિશનની રચના કરવામાં આવી છે. જોકે, અકસ્માતનું ચોક્કસ કારણ હજુ સુધી સામે આવ્યું નથી. કલિનિનગ્રાદ રશિયાનો મુખ્ય ભૂમિથી અલગ આવેલો વિસ્તાર છે, જે બાલ્ટિક સમુદ્રના કિનારે પોલેન્ડ અને લિથુઆનિયા જેવા નાટો સભ્ય દેશોની વચ્ચે આવેલો છે. અહીં રશિયાના બાલ્ટિક ફ્લીટનું મુખ્યાલય પણ છે. ચેર્યાખોવ્સ્ક જિલ્લામાં આવેલા સૈન્ય એરબેઝ પર Su-30SM સહિતના અનેક વિમાનો તૈનાત છે. આ વિમાનો નિયમિત રીતે તાલીમ અને પેટ્રોલિંગ માટે ઉડાન ભરે છે.

Su-30SMની વિશેષતાઓ અને તપાસ

Su-30SM બે બેઠકો ધરાવતું મલ્ટીરોલ ફાઈટર જેટ છે, જેનો ઉપયોગ હવાઈ સંરક્ષણ, હુમલા અને દરિયાઈ લશ્કરી કામગીરી માટે થાય છે. તેની લાંબી રેન્જ, શસ્ત્રો વહન કરવાની ક્ષમતા અને હવામાં ઝડપથી દિશા બદલવાની ક્ષમતા તેને મહત્ત્વપૂર્ણ બનાવે છે. પ્રાથમિક તપાસમાં ટેકનિકલ ખામી અને પાયલટની ભૂલ સહિતના પાસા તપાસવામાં આવી શકે છે. વિમાનના સંચાલનનો વધેલો સમય, જાળવણી અને અન્ય પરિબળોની પણ તપાસ થઈ શકે છે. જોકે, સત્તાવાર તપાસ પૂર્ણ થયા બાદ જ અકસ્માતનું સાચું કારણ સ્પષ્ટ થશે. આ ઘટના રશિયાના સૈન્ય ઉડ્ડયન ક્ષેત્રમાં સુરક્ષા અને જાળવણીને લગતા પડકારો ફરી ચર્ચામાં લાવી છે.

આ પણ વાંચો: Vibrant Gujarat Global Summit: ગુજરાતમાં રોકાણ માટે હર્ષ સંઘવીનું આમંત્રણ, ટોક્યોમાં એક જ દિવસમાં 20 બેઠકો