Earthquake In Pakistan: બલોચિસ્તાનના ખુઝદારની પાસે 5.7ની તીવ્રતાનો ભૂકંપ, આસપાસના વિસ્તારની પણ ધરા ધ્રુજી

Earthquake In Pakistan: પાકિસ્તાનના બલૂચિસ્તાન પ્રાંતમાં શનિવારે સવારે ભૂકંપના આંચકા નોંધાયા હતા. રિક્ટર સ્કેલ પર ભૂકંપની તીવ્રતા 5.7 નોંધાઈ હતી. ભૂકંપનું કેન્દ્ર ખુઝદાર શહેરથી આશરે 48 કિલોમીટર પશ્ચિમ-ઉત્તરપશ્ચિમ દિશામાં હોવાનું જણાવાયું છે.

17 ઓક્ટોબર, 2026ના રોજ સવારે આશરે 10:06થી 10:07 વાગ્યાની વચ્ચે પાકિસ્તાનના બલૂચિસ્તાન પ્રાંતમાં ભૂકંપ નોંધાયો હતો. વિવિધ એજન્સીઓ દ્વારા ભૂકંપની તીવ્રતા 5.6થી 5.9 વચ્ચે દર્શાવવામાં આવી હતી. પાકિસ્તાન હવામાન વિભાગના જણાવ્યા અનુસાર ભૂકંપનું કેન્દ્ર 28.02 ઉત્તર અક્ષાંશ અને 66.20 પૂર્વ રેખાંશ પર નોંધાયું હતું. આ ભૂકંપની સૌથી મહત્ત્વપૂર્ણ બાબત તેની ઓછી ઊંડાઈ છે. ભૂકંપનું કેન્દ્ર જમીનથી માત્ર 10 કિલોમીટર નીચે હોવાથી સપાટી પર વધુ તીવ્ર આંચકા અનુભવાઈ શકે છે. સામાન્ય રીતે ઓછી ઊંડાઈએ આવતા ભૂકંપ સમાન તીવ્રતાના ઊંડા ભૂકંપ કરતાં વધુ અસરકારક સાબિત થઈ શકે છે.

જાનહાનિ કે મોટાપાયે નુકસાનની કોઈ સત્તાવાર પુષ્ટિ થઈ નથી

ભૂકંપના કારણે ખુઝદાર સહિત આસપાસના ખારાન અને કલાત જેવા વિસ્તારોમાં પણ આંચકા અનુભવાયા હોવાની શક્યતા વ્યક્ત કરવામાં આવી છે. જોકે, પ્રાથમિક માહિતી અનુસાર જાનહાનિ કે મોટા પાયે નુકસાનની કોઈ સત્તાવાર પુષ્ટિ થઈ નથી. નિષ્ણાતોના જણાવ્યા અનુસાર બલૂચિસ્તાન વિસ્તાર ભૂકંપની દૃષ્ટિએ સંવેદનશીલ માનવામાં આવે છે. આ વિસ્તાર ભારતીય, યુરેશિયન અને અરેબિયન ટેક્ટોનિક પ્લેટોના પ્રભાવ હેઠળ આવેલો છે. પ્લેટોની સતત હિલચાલ અને દબાણને કારણે જમીનની અંદર ઊર્જા એકઠી થાય છે, જે અચાનક મુક્ત થતાં ભૂકંપ સર્જાય છે.

લોકોને સતર્ક રહેવાની સલાહ

અગાઉ પણ આ વિસ્તારમાં પાંચથી વધુ તીવ્રતાના ભૂકંપ નોંધાઈ ચૂક્યા છે. ભૂકંપ બાદ નાના આફ્ટરશોક્સ આવવાની શક્યતા રહેતી હોવાથી લોકોને સતર્ક રહેવાની સલાહ આપવામાં આવી છે. નબળાં મકાનો અને જૂના બાંધકામોમાં નુકસાન થવાની શક્યતાને ધ્યાનમાં રાખીને સાવચેતી રાખવી જરૂરી છે. લોકોને અફવાઓથી દૂર રહી સત્તાવાર સૂચનાઓનું પાલન કરવા અપીલ કરવામાં આવી છે.

આ પણ વાંચો: India Russia naval exercise 2026’ના દરિયાઈ તબક્કાની તૈયારીઓ પૂર્ણ, 18 ઑક્ટોબર સુધી ચાલશે અભ્યાસ