2027ની ચૂંટણી પહેલાં યોગીનો અખિલેશ યાદવની સપા પર કટાક્ષ, કહ્યું- ‘80 ટકા NDA અને 20 ટકા PDA’

Yogi Adityanath 80 20 Statement: ઉત્તર પ્રદેશમાં 2027ની વિધાનસભા ચૂંટણી પહેલાં રાજકીય ગરમાવો વધ્યો છે. મુખ્યમંત્રી યોગી આદિત્યનાથે સમાજવાદી પાર્ટી અને અખિલેશ યાદવના ‘PDA’ રાજકીય સૂત્ર પર કટાક્ષ કરતાં આગામી ચૂંટણીને લઈને ‘80-20’નું ગણિત રજૂ કર્યું છે. તેમણે કહ્યું કે ઉત્તર પ્રદેશની રાજ્યસભા ચૂંટણીના તાજેતરના ઘટનાક્રમે આગામી વિધાનસભા ચૂંટણીની તસવીર સ્પષ્ટ કરી દીધી છે. લખનઉમાં ‘સેવા જ્યોતિ યાત્રા-વિકસિત ભારત સંકલ્પ સભા’ને સંબોધતા યોગી આદિત્યનાથે કહ્યું કે ચૂંટણીની લડાઈ ફરી એકવાર 80 વિરુદ્ધ 20 પર આવી ગઈ છે. તેમના જણાવ્યા મુજબ 80 ટકા NDA અને 20 ટકા PDA સાથે રહેશે. તેમણે એમ પણ કહ્યું કે PDAની સ્થિતિ આગામી સમયમાં સ્પષ્ટ થઈ જશે.

રાજ્યસભા ચૂંટણીનો ઉલ્લેખ કરી સપા પર નિશાન

યોગીનું નિવેદન ઉત્તર પ્રદેશની આગામી રાજ્યસભા ચૂંટણીના સંદર્ભમાં આવ્યું છે. 10 બેઠકો માટે ભાજપના 8 અને સમાજવાદી પાર્ટીના 2 ઉમેદવારોએ ઉમેદવારી નોંધાવી છે. સપાએ ત્રીજો ઉમેદવાર નહીં ઉતારતાં તમામ 10 ઉમેદવારો બિનહરીફ ચૂંટાય તેવી સ્થિતિ સર્જાઈ છે, જોકે ચૂંટણી પ્રક્રિયા પૂર્ણ થવાની બાકી છે. રાજ્યસભા ચૂંટણી 16 ઓક્ટોબરે યોજાવાની છે. અખિલેશ યાદવે ત્રીજો ઉમેદવાર ઉતારવાના સંકેતો આપ્યા હતા, પરંતુ અંતે તેમણે 403 વિધાનસભા બેઠકો પર ધ્યાન કેન્દ્રિત કરવાની વાત કરી હતી. સપાની રાજકીય વ્યૂહરચનામાં ‘PDA’નો અર્થ પછાત, દલિત અને અલ્પસંખ્યક વર્ગ તરીકે કરવામાં આવે છે.

PM મોદીના 25 વર્ષના જાહેર જીવનનો ઉલ્લેખ

લખનઉના કાર્યક્રમમાં યોગી આદિત્યનાથે વડાપ્રધાન નરેન્દ્ર મોદીના જાહેર જીવનના 25 વર્ષ પૂર્ણ થવા બદલ તેમને અભિનંદન પાઠવ્યા હતા. તેમણે મોદીની 25 વર્ષની સફરને ગુજરાતના મુખ્યમંત્રીથી દેશના વડાપ્રધાન સુધીની જનસેવાની યાત્રા તરીકે રજૂ કરી હતી. કાર્યક્રમમાં ‘જનસેવા સે દેશસેવા’ પ્રદર્શનનું પણ અવલોકન કરવામાં આવ્યું હતું. યોગીએ વડાપ્રધાનના 25 વર્ષના જાહેર જીવનને દેશ માટે મહત્વપૂર્ણ અવસર ગણાવ્યો હતો. કાર્યક્રમ દરમિયાન ‘વિકસિત ભારત’ના સંકલ્પ સાથે જોડાયેલી પ્રવૃત્તિઓ પણ યોજાઈ હતી.