Ujjainમાં શાહી મસ્જિદ મામલે હાઈકોર્ટનો નિર્ણય, રોડ પહોળો કરવાની કામગીરીનો માર્ગ ખુલ્યો

Ujjain Shahi Masjid Road Widening: મધ્યપ્રદેશના ઉજ્જૈનમાં સિંહસ્થ-2028ની તૈયારીઓ વચ્ચે શાહી મસ્જિદના રસ્તાની હદમાં આવતા ભાગને દૂર કરવાના મુદ્દે ચાલી રહેલા વિવાદમાં હવે કાનૂની કાર્યવાહી આગળ વધી છે. 9 સપ્ટેમ્બરે મધ્યપ્રદેશ હાઈકોર્ટની ઈન્દોર બેન્ચની સિંગલ બેન્ચે શાહી મસ્જિદના અસરગ્રસ્ત ભાગને દૂર કરવાની કાર્યવાહી સામેની અરજીઓ ફગાવી હતી. ત્યારબાદ મસ્જિદ કમિટીએ ડિવિઝન બેન્ચમાં અપીલ કરી હતી.

કંટાળથી ગોપાલ મંદિર સુધી 15 મીટર રોડ પહોળો કરવાની યોજના

સિંહસ્થ-2028ને ધ્યાનમાં રાખીને કંટાળ ચોરાહાથી ગોપાલ મંદિર સુધીના આશરે 900 મીટર લાંબા માર્ગને 15 મીટર પહોળો કરવાની કામગીરી ચાલી રહી છે. આ માર્ગ મહાકાલ મંદિર, ગોપાલ મંદિર અને ક્ષિપ્રા નદી તરફ જતો મહત્વનો માર્ગ છે. પ્રશાસનનું કહેવું છે કે મોટા ધાર્મિક આયોજન દરમિયાન ટ્રાફિક વ્યવસ્થા અને શ્રદ્ધાળુઓની અવરજવર સરળ બનાવવા માટે રોડ પહોળો કરવો જરૂરી છે.

શાહી મસ્જિદના ભાગને લઈને વિવાદ

રોડના પ્રસ્તાવિત અલાઈનમેન્ટમાં શાહી મસ્જિદનો એક ભાગ આવી રહ્યો છે. મસ્જિદ પક્ષે કાર્યવાહી સામે વાંધો ઉઠાવી કોર્ટનો દરવાજો ખખડાવ્યો હતો. 9 સપ્ટેમ્બરના હાઈકોર્ટના નિર્ણયમાં અરજીઓ ફગાવી દેવામાં આવી હતી અને ત્યારબાદ મામલો ડિવિઝન બેન્ચ સમક્ષ લઈ જવાયો હતો. રિપોર્ટ્સ અનુસાર, પ્રશાસન અને મસ્જિદ સાથે જોડાયેલા લોકો વચ્ચે ચર્ચા બાદ અસરગ્રસ્ત ભાગને સ્વેચ્છાએ દૂર કરવાની વાત પણ સામે આવી હતી. જોકે, સોમવારે કાર્યવાહી શરૂ થતાં સ્થળ પર વિરોધ અને તણાવની સ્થિતિ સર્જાઈ હતી.

પથ્થરમારા બાદ પોલીસે છોડ્યા ટિયર ગેસના સેલ

સોમવારે શાહી મસ્જિદ નજીક મોટી સંખ્યામાં લોકો એકત્ર થયા હતા. કાર્યવાહીનો વિરોધ કરી રહેલા લોકો અને પોલીસ વચ્ચે અથડામણ જેવી સ્થિતિ સર્જાઈ હતી. પોલીસ પર પથ્થરમારો થયાની માહિતી બાદ પોલીસે ભીડને વિખેરવા માટે આંસુ ગેસના સેલ છોડ્યા હતા. વિસ્તારમાં ભારે પોલીસ બંદોબસ્ત સાથે RAFની પણ તૈનાતી કરવામાં આવી હતી. રિપોર્ટ્સ મુજબ, રવિવાર રાતથી જ મસ્જિદ અને આસપાસના વિસ્તારમાં લોકો એકત્ર થવા લાગ્યા હતા. પ્રશાસને કાયદો અને વ્યવસ્થા જાળવવા માટે બેરિકેડિંગ અને વધારાના સુરક્ષા બંદોબસ્તની વ્યવસ્થા કરી હતી.

સિંહસ્થ-2028ની તૈયારીઓ સાથે જોડાયેલો સમગ્ર મામલો

ઉજ્જૈનમાં સિંહસ્થ-2028ને ધ્યાનમાં રાખીને રોડ, ટ્રાફિક અને અન્ય ઈન્ફ્રાસ્ટ્રક્ચર પ્રોજેક્ટ પર કામગીરી ચાલી રહી છે. કંટાળ ચોરાહાથી ગોપાલ મંદિર માર્ગના પહોળીકરણમાં અનેક માળખાં અસરગ્રસ્ત થવાના હતા અને મોટાભાગના અસરગ્રસ્ત ભાગોને દૂર કરવાની કામગીરી થઈ ચૂકી હોવાનું રિપોર્ટ્સમાં જણાવાયું છે. શાહી મસ્જિદના ભાગને લઈને જોકે કાનૂની અને સ્થાનિક સ્તરે વિવાદ યથાવત રહ્યો હતો.