TamilNaduમાં ભારે વરસાદનો કહેર: નિલગિરીમાં ભૂસ્ખલન અને પૂરથી ગામનો સંપર્ક તૂટ્યો, જનજીવન ખોરવાયું
TamilNadu
TamilNaduમાં ભારે વરસાદનો કહેર: નિલગિરીમાં ભૂસ્ખલન અને પૂરથી ગામનો સંપર્ક તૂટ્યો, જનજીવન ખોરવાયું
TamilNadu
TamilNadu: તમિલનાડુના નિલગિરી જિલ્લામાં ભારે વરસાદને કારણે પૂર અને ભૂસ્ખલનની સ્થિતિ સર્જાઈ છે. મોયાર નદીમાં પાણીનું સ્તર વધતાં થેંગુમારાહાડા ગામનો આસપાસના વિસ્તારો સાથેનો સંપર્ક તૂટી ગયો છે. તેના કારણે ગામમાં ખોરાક, દવાઓ અને અન્ય આવશ્યક ચીજવસ્તુઓ પહોંચાડવામાં મુશ્કેલી ઊભી થઈ છે. સતત વરસાદને કારણે સ્થાનિક લોકોની મુશ્કેલીઓમાં વધારો થયો છે.
મોયાર નદીમાં પૂર, ગામવાસીઓની મુશ્કેલી વધી
થેંગુમારાહાડા ગામ સત્યમંગલમ અને મુદુમલાઈ ટાઇગર રિઝર્વ નજીક કોટાગિરી તાલુકાના ગાઢ જંગલ વિસ્તારમાં આવેલું છે. અહીંના લોકોને આવશ્યક સુવિધાઓ મેળવવા માટે મોયાર નદી પાર કરવી પડે છે.
છેલ્લા કેટલાક દિવસોથી નિલગિરી અને આસપાસના વિસ્તારોમાં સતત ભારે વરસાદ પડી રહ્યો છે. તેના કારણે નદીનું જળસ્તર જોખમી સપાટીથી ઉપર પહોંચી ગયું છે. સોમવારે નદીમાં પાણીનો પ્રવાહ અત્યંત તેજ હોવાથી સામાન્ય રીતે ઉપયોગમાં લેવાતા રસ્તેથી નદી પાર કરવી જોખમી બની હતી. પરિણામે, નદી પાર કરવાની વ્યવસ્થા બંધ કરવામાં આવી છે.
આ સ્થિતિને કારણે ખાસ કરીને દવાઓ અને અન્ય જરૂરી વસ્તુઓ માટે ગામની બહારની સુવિધાઓ પર નિર્ભર લોકોની ચિંતા વધી છે.
24 કલાકમાં ભૂસ્ખલનની 60થી વધુ ઘટનાઓ
ભારે વરસાદને કારણે પહાડી જિલ્લામાં વ્યાપક નુકસાન થયું છે. છેલ્લા 24 કલાકમાં ભૂસ્ખલનની 60થી વધુ ઘટનાઓ નોંધાઈ હોવાનું અહેવાલમાં જણાવાયું છે. તેમાં માટી ધસી પડવાથી લઈને મોટા પ્રમાણમાં પહાડોના ઢોળાવો તૂટી પડવાની ઘટનાઓનો સમાવેશ થાય છે.
એક દુઃખદ ઘટનામાં શુક્રવારે મેટ્ટુપલયમ-કુન્નૂર પહાડી માર્ગ પર પરાલિયાર નજીક મોટા ભૂસ્ખલનની ઝપેટમાં આવતાં 51 વર્ષીય સરકારી બસ ડ્રાઇવર જનગરાજનું મોત થયું હતું.
નીલગિરી માઉન્ટેન રેલવે પણ પ્રભાવિત
ભૂસ્ખલનને કારણે નીલગિરી માઉન્ટેન રેલવેની સેવાઓ પણ પ્રભાવિત થઈ છે. કુન્નૂર-મેટ્ટુપલયમ સેક્શનમાં પાટા પર કાટમાળ જમા થતાં ટ્રેનોનું સંચાલન અસ્થાયી રીતે રોકવામાં આવ્યું છે. તેના કારણે જિલ્લામાં પરિવહનની મુશ્કેલીઓ વધુ વધી છે.
બચાવ અને રાહત કામગીરી ચાલુ
જિલ્લા વહીવટીતંત્ર અને ફાયર એન્ડ રેસ્ક્યૂ સર્વિસના કર્મચારીઓ અસરગ્રસ્ત વિસ્તારોમાં બચાવ અને રાહત કામગીરી કરી રહ્યા છે. ભૂસ્ખલનને કારણે બંધ થયેલા રસ્તાઓ પરથી માટી અને કાટમાળ દૂર કરવાની કામગીરી પણ ચાલુ છે.
મેટ્ટુપલયમ-કુન્નૂર માર્ગ પર અવરજવર માટે અસરગ્રસ્ત રસ્તાઓ સાફ ન થાય ત્યાં સુધી વાહનોને કોટાગિરીના માર્ગે વાળવામાં આવી રહ્યાં છે.
જિલ્લા કલેક્ટરે સ્થાનિક લોકો અને પ્રવાસીઓને પરિસ્થિતિ સામાન્ય ન થાય ત્યાં સુધી પહાડી રસ્તાઓ પર બિનજરૂરી મુસાફરી ટાળવાની અપીલ કરી છે. કટોકટીની સ્થિતિમાં મદદ માટે નિલગિરી જિલ્લા નિયંત્રણ કક્ષના 1077 અથવા 0423-2450024 નંબર પર સંપર્ક કરવાની સલાહ આપવામાં આવી છે.
