ભારતની સમુદ્રી શક્તિ વધી રહી છે, નૌકાદળ દેશની સુરક્ષાનું મજબૂત કવચ: રક્ષામંત્રી રાજનાથ સિંહ

Indian Navy Maritime Power: રક્ષામંત્રી રાજનાથ સિંહે 5 ઓક્ટોબર, 2026ના રોજ વિશાખાપટ્ટનમમાં પૂર્વી નૌકાદળ કમાન્ડ દ્વારા આયોજિત ‘બારાખાના’ કાર્યક્રમમાં ભાગ લીધો હતો. આ દરમિયાન તેમણે ભારતીય નૌકાદળના જવાનો અને તેમના પરિવારજનો સાથે સંવાદ કર્યો હતો. રક્ષા મંત્રીએ દેશના સમુદ્રી હિતોની સુરક્ષા માટે નૌકાદળના જવાનોની અડગ પ્રતિબદ્ધતાની પ્રશંસા કરી હતી. સાથે જ નૌકાદળના જવાનોના પરિવારજનોના યોગદાન અને બલિદાનને પણ બિરદાવ્યું હતું.

ભારતીય નૌકાદળની વધતી યુદ્ધક ક્ષમતાનો ઉલ્લેખ

રાજનાથ સિંહે ભારતીય નૌકાદળને શક્તિશાળી સમુદ્રી શક્તિ તરીકે ઉભરી રહેલું ગણાવ્યું હતું. તેમણે કહ્યું કે હિંદ-પ્રશાંત ક્ષેત્રમાં ભારતીય નૌકાદળની ક્ષમતાને માન્યતા મળી રહી છે અને નૌકાદળ તમામ પરિસ્થિતિઓમાં દેશની સમુદ્રી સરહદોની સુરક્ષા માટે પ્રતિબદ્ધ છે. રક્ષા મંત્રીએ 1971ના યુદ્ધ દરમિયાન નૌકાદળની નિર્ણાયક ભૂમિકાનો ઉલ્લેખ કરતાં ‘ઓપરેશન ટ્રાઇડન્ટ’ને યાદ કર્યું હતું. આ ઓપરેશન દરમિયાન ભારતીય નૌકાદળે કરાચી બંદર પર હુમલો કર્યો હતો. તેમણે કહ્યું કે આ અભિયાને નૌકાદળની રક્ષણાત્મક સાથે જરૂર પડે ત્યારે આક્રમક ક્ષમતા પણ દર્શાવી હતી.

સ્વદેશી સંરક્ષણ ક્ષમતાને પ્રોત્સાહન

રાજનાથ સિંહે કહ્યું કે ભારત 21મી સદીના બદલાતા સુરક્ષા પરિદૃશ્ય સાથે પોતાની નૌકાદળની ક્ષમતામાં સતત વધારો કરી રહ્યું છે. દેશમાં સ્વદેશી વિમાનવાહક જહાજો, પરમાણુ સબમરીન, સ્ટીલ્થ ફ્રિગેટ્સ અને સ્કોર્પિન શ્રેણીની સબમરીન સહિત આધુનિક પ્લેટફોર્મનું નિર્માણ અને નૌકાદળમાં સમાવેશ થઈ રહ્યો છે. તેમણે સ્પષ્ટ કર્યું કે નૌકાદળની શક્તિ માત્ર યુદ્ધજહાજો, સબમરીન અને આધુનિક ટેક્નોલોજી સુધી મર્યાદિત નથી, પરંતુ તેના જવાનોની વ્યાવસાયિક કુશળતા, દેશભક્તિ, સાહસ અને પ્રતિબદ્ધતા પણ તેની તાકાતનો મહત્વનો આધાર છે.

‘સમુદ્રથી સમૃદ્ધિ અને શક્તિ તરફ આગળ વધવું જોઈએ’

રક્ષામંત્રીએ ભારતની વિશાળ સમુદ્રી ક્ષમતાનો મહત્તમ ઉપયોગ કરવાની જરૂરિયાત પર ભાર મૂક્યો હતો. તેમણે કહ્યું કે મહાસાગરોને માત્ર સુરક્ષાની દૃષ્ટિએ નહીં પરંતુ આર્થિક વિકાસ, વ્યૂહાત્મક પ્રભાવ અને રાષ્ટ્રીય સમૃદ્ધિની તકો તરીકે પણ જોવાની જરૂર છે.

નૌકાદળના પરિવારોના યોગદાનને બિરદાવ્યું

‘બારાખાના’ કાર્યક્રમની પારિવારિક ભાવનાનો ઉલ્લેખ કરતાં રાજનાથ સિંહે કહ્યું કે આવા કાર્યક્રમો નૌકાદળના જવાનો, તેમના પરિવારજનો અને નેતૃત્વ વચ્ચેના સંબંધોને વધુ મજબૂત બનાવે છે. તેમણે કહ્યું કે જ્યારે નૌકાદળના જવાનો દેશની સેવા માટે સમુદ્રમાં તૈનાત હોય છે ત્યારે તેમના પરિવારજનો ઘરની જવાબદારીઓ સંભાળે છે અને જવાનોને ફરજ નિભાવવામાં જરૂરી સહયોગ અને હિંમત આપે છે. રક્ષા મંત્રીએ નૌકાદળના જવાનોની સેવા અને તેમના પરિવારજનોના બલિદાનને રાષ્ટ્રીય સંપત્તિ ગણાવ્યું હતું.