Nita Ambaniની મોટી પહેલ: કરજતમાં 100 એકરની અનંત આશ્રય ટાઉનશિપ બનશે, 5,000થી વધુ લોકોને મળશે આજીવન ઘર

Nita Ambani: રિલાયન્સ ફાઉન્ડેશનના સ્થાપક અને ચેરપર્સન નીતા અંબાણીએ અનાથ બાળકો, વરિષ્ઠ નાગરિકો અને દિવ્યાંગ વ્યક્તિઓ માટે એક વિશેષ પહેલની જાહેરાત કરી છે. ‘નીતા મુકેશ અંબાણી અનંત આશ્રય’ નામની આ ટાઉનશિપ મહારાષ્ટ્રના કરજત ખાતે આશરે 100 એકર જમીનમાં વિકસાવવાની યોજના છે. આ પ્રોજેક્ટનો હેતુ 5,000થી વધુ લોકોને આજીવન ઘર, આરોગ્ય સેવાઓ, સંભાળ અને સન્માનપૂર્ણ જીવન જીવવાની તકો પૂરી પાડવાનો છે.

કરજતમાં ભૂમિપૂજન અને શિલાન્યાસ

રિલાયન્સ ફાઉન્ડેશન દ્વારા જાહેર કરવામાં આવેલી માહિતી મુજબ, નીતા અંબાણીએ કરજત ખાતે પ્રસ્તાવિત સ્થળે ભૂમિપૂજન અને શિલાન્યાસ વિધિ સંપન્ન કરી હતી. આ ટાઉનશિપને કાયમી બિનનફાકારક સંસ્થા તરીકે વિકસાવવાની યોજના છે. જોકે, તેનું નિર્માણ જરૂરી સરકારી મંજૂરીઓને આધીન તબક્કાવાર રીતે કરવામાં આવશે.

નીતા અંબાણીએ જણાવ્યું હતું કે આ પહેલ તેમના અને તેમના પરિવારના હૃદયની નજીક છે. તેમનો ઉદ્દેશ દિવ્યાંગ વ્યક્તિઓ, માતા-પિતા વિનાનાં બાળકો અને સંભાળની જરૂરિયાત ધરાવતા વરિષ્ઠ નાગરિકો માટે એવું ઘર બનાવવાનો છે, જ્યાં તેમને પરિવાર જેવી હૂંફ, તબીબી સહાય અને જીવનમાં આગળ વધવાની તક મળે.

તેમણે ખાસ કરીને એવા માતા-પિતાની ચિંતા અંગે વાત કરી હતી, જેઓ પોતાના પછી દિવ્યાંગ સંતાનોની સંભાળ કોણ રાખશે તે વિચારે છે. આ આશ્રય દ્વારા આવા પરિવારોને તેમના સંતાનો માટે કાયમી ઘર અને સંભાળની વ્યવસ્થા ઉપલબ્ધ કરાવવાનો પ્રયાસ કરવામાં આવશે.

15 હજાર લોકોનો સમુદાય વિકસાવવાની યોજના

આશરે 100 એકરમાં ફેલાનારી આ ટાઉનશિપમાં 5,000થી વધુ નિવાસીઓને આજીવન ઘર આપવાની યોજના છે. કેરગીવર્સ, તબીબી નિષ્ણાતો, સહાયક કર્મચારીઓ અને તેમના પરિવારોને જોડતાં અહીં આશરે 15,000 લોકોનો સમુદાય વિકસવાની અપેક્ષા છે.

આ ટાઉનશિપમાં રહેણાક ઘરો, મંદિર, હોસ્પિટલ, રમતગમતનાં મેદાનો, બગીચા, ફાર્મ અને વર્કશોપ જેવી સુવિધાઓ ઊભી કરાશે. નિવાસીઓને દર્દી તરીકે નહીં, પરંતુ સમુદાયના સભ્ય અને પાડોશી તરીકે રહેવાની તક મળે તે રીતે સમગ્ર વ્યવસ્થાનું આયોજન કરવામાં આવ્યું છે.

નિવાસીઓ નાના અને કૌટુંબિક વાતાવરણ ધરાવતા ઘરોમાં રહેશે. તેમની સાથે હાઉસ પેરેન્ટ્સ અને તાલીમપ્રાપ્ત કેરટેકર્સ રહેશે. દરેક વ્યક્તિની જરૂરિયાત મુજબ આરોગ્ય, શિક્ષણ, કૌશલ્ય, રોજગાર અને વ્યક્તિગત વિકાસ માટે અલગ યોજના બનાવવામાં આવશે. આ યોજનાની દર છ મહિને સમીક્ષા કરવાની પણ જોગવાઈ છે.

આઠ રહેણાક ગામો અને સ્થાનિક સમુદાયને પણ લાભ

પ્રસ્તાવિત ટાઉનશિપમાં આઠ રહેણાક ગામો બનાવવામાં આવશે. દરેક ગામનું નામ ભારતની પવિત્ર નદીઓ પરથી રાખવાની યોજના છે. દરેક ગામમાં અલગ રંગ, પ્રતીક અને સેન્સરી ગાર્ડન હશે, જેથી નિવાસીઓને આસપાસના વિસ્તારમાં સરળતાથી અવરજવર કરવામાં મદદ મળે.

આ પ્રોજેક્ટ માત્ર નિવાસીઓ પૂરતો મર્યાદિત નહીં રહે. તેની હોસ્પિટલ, મંદિર, રમતગમતની સુવિધાઓ અને કાફે આસપાસનાં ગામોના લોકો માટે પણ ઉપલબ્ધ કરાવવાની યોજના છે. આ ઉપરાંત, સ્થાનિક વિસ્તારના આશરે 1,000 લોકોને થેરાપી, શિક્ષણ અને રોજગારની તકો મળવાની અપેક્ષા છે. પરિવારોને રાહત સંભાળ, મોબાઇલ મેડિકલ ક્લિનિક્સ અને સામુદાયિક આરોગ્ય સેવાઓનો લાભ પણ મળી શકશે.

હોસ્પિટલથી લઈને પુનર્વસન કેન્દ્ર સુધીની સુવિધાઓ

‘અનંત આશ્રય’માં વિશિષ્ટ સુવિધાઓ ધરાવતી હોસ્પિટલ બનાવવાની યોજના છે. તેમાં ડેવલપમેન્ટલ મેડિસિન, એપિલેપ્સી સારવાર, વિશેષ જરૂરિયાત ધરાવતા લોકો માટે ડેન્ટલ કેર અને પેલિયેટિવ કેર જેવી સેવાઓનો સમાવેશ થશે.

આ ઉપરાંત, ફિઝિયોથેરાપી, ઓક્યુપેશનલ થેરાપી, સ્પીચ થેરાપી અને હાઇડ્રોથેરાપી માટે આધુનિક પુનર્વસન કેન્દ્ર બનાવવામાં આવશે. દિવ્યાંગ બાળકો માટે વિશેષ શિક્ષણની વ્યવસ્થા સાથે સ્ટાફનાં બાળકો માટે સામાન્ય શાળાનું એકીકૃત મોડેલ પણ વિકસાવવાની યોજના છે.

સંગીત, કલા, રમતગમત અને સર્જનાત્મક પ્રવૃત્તિઓ માટે અલગ પરિસર ઊભું કરાશે. વનતારા સાથેના સહયોગથી એનિમલ કમ્પેનિયનશિપ ફાર્મ બનાવવાની પણ યોજના છે, જ્યાં નિવાસીઓ અને પ્રાણીઓ વચ્ચે લાગણીસભર જોડાણ વિકસાવી શકાય.

કૌશલ્ય તાલીમ અને રોજગારની તકો

નિવાસીઓને આત્મનિર્ભર બનાવવા માટે બેકરી, કાફે અને ક્રાફ્ટ સ્ટુડિયો જેવી સુવિધાઓ ઊભી કરાશે. અહીં તેઓ વિવિધ કૌશલ્યો શીખી શકશે અને પોતાની ક્ષમતા મુજબ કામ કરીને મહેનતાણું પણ મેળવી શકશે.

આ ઉપરાંત, દિવ્યાંગ વ્યક્તિઓની સંભાળ સાથે જોડાયેલા ક્ષેત્રના કર્મચારીઓ માટે રાષ્ટ્રીય તાલીમ અકાદમી બનાવવાની યોજના છે. જીવનના અંતિમ તબક્કામાં રહેલા લોકો માટે સમર્પિત હોસ્પાઇસ વિંગ અને સ્મૃતિ ઉપવન પણ વિકસાવવામાં આવશે.

સંભાળની જરૂરિયાત ધરાવતા પરિવારોને આશરો આપવાનો પ્રયાસ

આ પહેલ ખાસ કરીને સેરેબ્રલ પાલ્સી, ઓટિઝમ, એપિલેપ્સી અને જટિલ તબીબી પરિસ્થિતિઓ સાથે જીવતા લોકો માટે ઉપયોગી બનવાની અપેક્ષા છે. જેમને સતત નિષ્ણાત સંભાળની જરૂર હોય છે, તેમને અહીં આરોગ્ય, સુરક્ષા અને વિકાસની તકો પૂરી પાડવાનો ઉદ્દેશ છે.

રિલાયન્સ ફાઉન્ડેશનના જણાવ્યા અનુસાર, આ પ્રોજેક્ટનો મુખ્ય વિચાર એવો સમુદાય ઊભો કરવાનો છે જ્યાં કોઈ વ્યક્તિ એકલતા અનુભવે નહીં અને દરેકને જીવનભર માટે પોતાનું કહી શકાય એવું ઘર મળે.

આ પણ વાંચો : Kutch Earth quake: ભારત-પાકિસ્તાન સરહદ પર 3.2ની તીવ્રતા નોંધાઈ, ત્રણ દિવસમાં બીજી ઘટના