કાશ્મીરમાં સુરક્ષાદળોને મોટી સફળતા, યૂસમર્ગ એન્કાઉન્ટરમાં લશ્કર કમાન્ડર યાસિર ઠાર

Kashmir Encounter Lashkar Commander Yasir: જમ્મુ-કાશ્મીરમાં આતંકવાદ વિરુદ્ધ ચાલી રહેલા ઓપરેશન વચ્ચે સુરક્ષાદળોને મોટી સફળતા મળી છે. શનિવારે યૂસમર્ગ વિસ્તારમાં સંયુક્ત સુરક્ષાદળો સાથે થયેલી અથડામણમાં પાકિસ્તાની લશ્કર-એ-તૈયબા સાથે જોડાયેલો કમાન્ડર યાસિર માર્યો ગયો હોવાની માહિતી સામે આવી છે. સૂત્રોના જણાવ્યા અનુસાર યાસિર અગાઉ લશ્કરના મોટા સુલેમાન મૂસા ગ્રુપનો હિસ્સો હતો. જોકે, આશરે એક વર્ષ પહેલા તે આ ગ્રુપથી અલગ થઈ ગયો હતો. ત્યારબાદ તે અલગ રીતે કામ કરતો હતો અને યૂસમર્ગ વિસ્તારમાં લશ્કરના એક મુખ્ય કમાન્ડર તરીકે સક્રિય હતો.

https://twitter.com/ParaSF007/status/2096161681395318920

લાંબા સમયથી સુરક્ષાદળોની નજરમાં હતો યાસિર

સુરક્ષા એજન્સીઓ લાંબા સમયથી યાસિરની ગતિવિધિઓ પર નજર રાખી રહી હતી. શનિવારે યૂસમર્ગ વિસ્તારમાં સુરક્ષાદળો અને યાસિર વચ્ચે સામનો થતાં અથડામણ શરૂ થઈ હતી. આ કાર્યવાહીમાં સુરક્ષાદળોએ યાસિરને ઠાર માર્યો હતો. યૂસમર્ગમાં થયેલું આ એન્કાઉન્ટર જમ્મુ-કાશ્મીરમાં ચાલી રહેલા આતંકવાદ વિરોધી અભિયાનનો એક ભાગ છે.

યાસિરના નેટવર્કની તપાસ શરૂ

યાસિરના મોત બાદ સુરક્ષા એજન્સીઓ તેના નેટવર્ક અને લશ્કર-એ-તૈયબાના અન્ય આતંકીઓ સાથેના સંપર્કોની તપાસ કરી રહી છે. તાજેતરની કોઈ આતંકવાદી પ્રવૃત્તિનું કાવતરું ઘડવામાં અથવા તેને અંજામ આપવામાં તેની ભૂમિકા હતી કે કેમ તે અંગે પણ તપાસ કરવામાં આવી રહી છે.

બડગામમાં પણ એક આતંકી ઠાર

આ પહેલા મધ્ય કાશ્મીરના બડગામ જિલ્લામાં શુક્રવારે સેના અને અન્ય સુરક્ષાદળો સાથે થયેલી અથડામણમાં પાકિસ્તાની નાગરિક હોવાની શંકા ધરાવતા એક આતંકીને ઠાર કરવામાં આવ્યો હતો. વિસ્તારમાં અન્ય એક શંકાસ્પદ આતંકી છુપાયો હોવાની આશંકાને પગલે સુરક્ષાદળો દ્વારા સર્ચ ઓપરેશન હાથ ધરવામાં આવ્યું હતું. આ ઓપરેશન ભારતીય સેના, જમ્મુ-કાશ્મીર પોલીસ અને સીઆરપીએફ દ્વારા સંયુક્ત રીતે હાથ ધરવામાં આવ્યું હતું.

પીર પંજાલના પહાડી વિસ્તારોમાં આતંકીઓની હિલચાલ ટ્રેક કરાઈ

અધિકારીઓના જણાવ્યા અનુસાર સુરક્ષાદળોએ પૂંછના અશદર ગલીથી યૂસમર્ગ થઈને પુલવામાના પાખેરપોરા તરફ આગળ વધી રહેલા શંકાસ્પદ આતંકીઓના એક જૂથની હિલચાલ ટ્રેક કરી હતી. સેનાએ પીર પંજાલ પર્વતમાળાના ઊંચાઈવાળા પહાડી માર્ગોમાંથી પસાર થઈ રહેલા આ જૂથ પર નજર રાખી હતી. ત્યારબાદ 1 સપ્ટેમ્બરે વિસ્તારમાં ઘેરાબંધી કરવામાં આવી હતી અને 3 સપ્ટેમ્બરે અશદર ગલી વિસ્તારમાં સુરક્ષાદળોનો આતંકીઓ સાથે સંપર્ક થયો હતો.