Commodity Market: વૈશ્વિક અસ્થિરતા વધતાં સોના-ચાંદીમાં ખરીદીનો માહોલ, બંને કિંમતી ધાતુઓના ભાવમાં 1% સુધીનો ઉછાળો
Commodity Market
Commodity Market: વૈશ્વિક અસ્થિરતા વધતાં સોના-ચાંદીમાં ખરીદીનો માહોલ, બંને કિંમતી ધાતુઓના ભાવમાં 1% સુધીનો ઉછાળો
Commodity Market
Commodity Market: વૈશ્વિક સ્તરે અસ્થિરતા વધતા મંગળવારે સોના અને ચાંદીમાં ફરી ખરીદી જોવા મળી છે. જેના કારણે બંને કિંમતી ધાતુઓના ભાવમાં લગભગ એક ટકાનો ઉછાળો નોંધાયો છે. અમેરિકા-ઈરાન વચ્ચે વધતા તણાવ અને વૈશ્વિક બજારમાં અનિશ્ચિતતા વચ્ચે રોકાણકારો ફરી સોના-ચાંદી તરફ વળ્યા હોવાનું નિષ્ણાતોનું માનવું છે.
MCX પર સોનાના ભાવમાં તેજી
મલ્ટી કમોડિટી એક્સચેન્જ (MCX) પર 5 ઓક્ટોબર 2026ના સોનાના કોન્ટ્રેક્ટમાં તેજી જોવા મળી. સોનું અગાઉના 1,52,818 રૂપિયા પ્રતિ 10 ગ્રામના ક્લોઝિંગ સામે 1,53,362 રૂપિયા પર ખુલ્યું હતું. સવારે 10 વાગ્યે સોનું 1,207 રૂપિયા એટલે કે 0.79% વધીને 1,54,025 રૂપિયા પ્રતિ 10 ગ્રામ પર ટ્રેડ થઈ રહ્યું હતું. અત્યાર સુધીના કારોબારમાં સોનાએ 1,53,361 રૂપિયાનો નીચો અને 1,54,125 રૂપિયાનો ઊંચો ભાવ નોંધાવ્યો હતો.
ચાંદીમાં પણ ખરીદી તેજ
સોનાની સાથે ચાંદીમાં પણ રોકાણકારોની ખરીદી જોવા મળી. MCX પર 4 ડિસેમ્બર 2026ની ચાંદીનો કોન્ટ્રેક્ટ અગાઉના 2,39,016 રૂપિયા પ્રતિ કિલોગ્રામના ક્લોઝિંગ સામે 2,40,009 રૂપિયા પર ખુલ્યો હતો. સવારે 10 વાગ્યે ચાંદી 2,185 રૂપિયા એટલે કે 0.91% વધીને 2,41,201 રૂપિયા પ્રતિ કિલોગ્રામ પર પહોંચી હતી. કારોબારમાં ચાંદીએ અત્યાર સુધીમાં 2,40,009 રૂપિયાનો નીચો અને 2,41,724 રૂપિયાનો ઊંચો ભાવ નોંધાવ્યો હતો.
આંતરરાષ્ટ્રીય બજારમાં પણ તેજી
આંતરરાષ્ટ્રીય બજારમાં પણ કિંમતી ધાતુઓમાં વધારો જોવા મળી રહ્યો છે. સોનું હળવી તેજી સાથે 4,478 ડોલર પ્રતિ ઔંસ આસપાસ હતું, જ્યારે ચાંદી 1.27% વધીને લગભગ 67.50 ડોલર પ્રતિ ઔંસ પર પહોંચી હતી.
હવે અમેરિકાના મોંઘવારીના આંકડા પર નજર
નિષ્ણાતોના જણાવ્યા અનુસાર અમેરિકા-ઈરાન યુદ્ધને કારણે વધતી વૈશ્વિક અસ્થિરતાએ સોના-ચાંદીની માંગને ટેકો આપ્યો છે. બીજી તરફ ક્રૂડ ઓઈલના વધતા ભાવને કારણે મોંઘવારી અંગેની ચિંતા પણ વધી રહી છે. હવે રોકાણકારોની નજર અમેરિકાના આગામી મોંઘવારીના આંકડા અને ફેડરલ રિઝર્વની આગામી નીતિના સંકેતો પર છે. આ આંકડાઓ પરથી આવનારા સમયમાં સોનાની કિંમતની દિશા નક્કી કરવામાં મહત્વની ભૂમિકા ભજવાઈ શકે છે.
