Russian Armyમાં જોડાવા મુદ્દે ભારત સરકારની કડક ચેતવણી, કહ્યું—‘જોખમી અને જીવલેણ બની શકે છે’

India Warning on Joining Russian Army: રશિયન સેનામાં ભારતીય નાગરિકોની ભરતી થવાના અહેવાલો વચ્ચે ભારત સરકારે ફરી એકવાર નાગરિકોને સાવચેત કર્યા છે. વિદેશ મંત્રાલયે 30 સપ્ટેમ્બરે જાહેર કરેલી એડવાઇઝરીમાં રશિયન સશસ્ત્ર દળોમાં જોડાવાને જોખમી અને જીવલેણ ગણાવ્યું છે. સરકારે ભારતીય નાગરિકોને આ પ્રકારની ભરતીથી દૂર રહેવાની અને વિદેશમાં નોકરી મેળવતી વખતે સાવચેતી રાખવાની સલાહ આપી છે.

છેલ્લા બે વર્ષથી સરકાર આપી રહી છે ચેતવણી

વિદેશ મંત્રાલયના જણાવ્યા મુજબ, છેલ્લા બે વર્ષ દરમિયાન ભારતીય નાગરિકોને રશિયન સેનામાં ભરતી સાથે સંકળાયેલા ગંભીર જોખમો અંગે અનેક વખત ચેતવણી આપવામાં આવી છે. મંત્રાલયે વિદેશમાં રોજગારીની તકો શોધતા લોકોને અપ્રમાણિત એજન્ટો અથવા બિનસરકારી સંસ્થાઓ દ્વારા આપવામાં આવતી નોકરીની ઑફરથી સાવધ રહેવા પણ જણાવ્યું છે.

આર્થિક લાભની લાલચમાં જોખમ ન લેવા અપીલ

મંત્રાલયે જણાવ્યું છે કે કેટલાક લોકો આર્થિક લાભની આશાએ સ્વેચ્છાએ રશિયન સશસ્ત્ર દળોમાં જોડાવા માટે આગળ આવી રહ્યા હોવાના કિસ્સા સામે આવ્યા છે. કેટલાક લોકો એવી ધારણા રાખે છે કે ભરતી થયા બાદ તેઓ ભારત સરકારનો સંપર્ક કરીને સેનામાંથી મુક્તિ મેળવી શકશે. સરકારે સ્પષ્ટ કર્યું છે કે આ પ્રકારનું પગલું ગંભીર જોખમ ઊભું કરી શકે છે અને નાગરિકોએ આવી ધારણાના આધારે નિર્ણય ન લેવો જોઈએ.

નાગરિકતા છોડવા અને રશિયન પાસપોર્ટ મેળવવાના કિસ્સા

વિદેશ મંત્રાલયના નિવેદન અનુસાર, કેટલાક લોકોએ ભારતીય નાગરિકતા છોડવા અને રશિયન પાસપોર્ટ મેળવવા અંગે પણ ભારતીય અધિકારીઓનો સંપર્ક કર્યો હોવાના કિસ્સા સામે આવ્યા છે. મંત્રાલયે ટૂંકા ગાળાના આર્થિક લાભ માટે પોતાની સુરક્ષા અને ભવિષ્યને જોખમમાં ન મૂકવાની સલાહ આપી છે.

રશિયામાં રહેલા ભારતીયોને પરત લાવવા પ્રયાસો

ભારત સરકારે જણાવ્યું છે કે રશિયન સશસ્ત્ર દળોમાં સેવા આપી રહેલા ભારતીય નાગરિકોની સુરક્ષા અને સુખાકારી સુનિશ્ચિત કરવા માટે રશિયન પક્ષ સાથે સતત સંપર્ક જાળવવામાં આવી રહ્યો છે. આવા ભારતીય નાગરિકોને શક્ય તેટલી વહેલી તકે ભારત પરત લાવવા માટે પણ સરકાર પ્રયાસ કરી રહી છે. વિદેશ મંત્રાલયે ભારતીય નાગરિકોને રશિયન સેનામાં જોડાવાની ઑફર સ્વીકારતા પહેલાં તેના ગંભીર પરિણામો સમજવા અને આવા પગલાંથી દૂર રહેવા અપીલ કરી છે.