Exercise Tarang Shakti 2026: જોધપુરમાં IAFએ શરૂ કર્યો ઓપરેશનલ તબક્કો

Exercise Tarang Shakti 2026 : ભારતીય વાયુસેનાએ જોધપુર એરફોર્સ સ્ટેશન ખાતે બહુરાષ્ટ્રીય હવાઈ કવાયત 'Exercise Tarang Shakti 2026'નો ઓપરેશનલ તબક્કો શરૂ કર્યો છે. 26 સપ્ટેમ્બરથી 12 ઓક્ટોબર 2026 દરમિયાન યોજાનારી આ કવાયતની થીમ 'Power in Partnership' રાખવામાં આવી છે. આ થીમ ભાગીદાર દેશોની વાયુસેનાઓ વચ્ચે સહકાર, અનુભવની આપ-લે અને પરસ્પર કામગીરીની ક્ષમતા વધારવા પર ભાર મૂકે છે.

એર-ટુ-એર રિફ્યુઅલિંગ ક્ષમતાઓનું પણ પ્રદર્શન

આ કવાયતમાં ઓસ્ટ્રેલિયા, અમેરિકા, યુનાઈટેડ આરબ અમીરાત, ફ્રાન્સ, જર્મની, શ્રીલંકા અને બાંગ્લાદેશ સહિત સાત મિત્ર દેશો ભાગ લઈ રહ્યા છે. વિદેશી વાયુસેનાઓ દ્વારા 'F-35 Lightning II, Rafale, F-16, A400M, MRTT, C-130, C-130J અને KC-30A' જેવા અદ્યતન વિમાનોનો સમાવેશ કરવામાં આવ્યો છે. આ કવાયતમાં ફાઈટર એરક્રાફ્ટ ઉપરાંત એરલિફ્ટ અને એર-ટુ-એર રિફ્યુઅલિંગ ક્ષમતાઓનું પણ પ્રદર્શન થશે.

અન્ય કેટલાક મિત્ર દેશો ઓબ્ઝર્વર તરીકે જોડાશે

2024માં યોજાયેલી પ્રથમ આવૃત્તિ બાદ Tarang Shakti 2026માં ભાગ લેનારી વાયુસેનાઓને સંયુક્ત તાલીમ, ઓપરેશનલ અનુભવની આપ-લે અને વ્યાવસાયિક ક્ષમતાઓને વધુ મજબૂત કરવાની તક મળશે. ભારતીય વાયુસેના સાથે વિદેશી દળો વિવિધ હવાઈ મિશનમાં ભાગ લેશે, જ્યારે અન્ય કેટલાક મિત્ર દેશો ઓબ્ઝર્વર તરીકે જોડાશે. કવાયત દરમિયાન એરક્રૂ, મિશન પ્લાનર્સ અને ઓપરેશનલ સપોર્ટ સ્ટાફ વચ્ચે વ્યાવસાયિક સંવાદ પર ભાર મૂકવામાં આવશે. ઉપરાંત એરોસ્પેસ સેફ્ટી, પરસ્પર સમજ અને ઓપરેશનલ પ્રક્રિયાઓની જાણકારી વધારવા માટે વિવિધ પ્રવૃત્તિઓ યોજાશે.

આ કવાયત માત્ર હવાઈ કામગીરી પૂરતી મર્યાદિત નથી. તેમાં સેમિનાર, વિદેશી દળો માટે ઈન્ડસ્ટ્રીયલ ટૂર, સેખોન મેરેથોન, હેરિટેજ ટૂર અને યોગ સેશન જેવી વ્યાવસાયિક તથા સાંસ્કૃતિક પ્રવૃત્તિઓનો પણ સમાવેશ થાય છે. 'Power in Partnership' થીમ સાથે Tarang Shakti 2026 ભારતની સંરક્ષણ ક્ષમતાઓ અને સ્વદેશી એરોસ્પેસ ક્ષેત્રને પ્રદર્શિત કરવાની સાથે ભાગીદાર દેશો વચ્ચે પરસ્પર વિશ્વાસ અને સૈન્ય સહકારને વધુ મજબૂત બનાવશે.

આ પણ વાંચો : Man ki Baat : સર્જિકલ સ્ટ્રાઈકથી ઓપરેશન સિંદૂર સુધી, PM મોદીએ ગણાવી ભારતની નીતિ